މި ސަރުކާރުން ތަރައްގީކޮށް ހުޅުވާ ފުރަތަމަ ސްކޫލް، "ޝަހީދު އަލީ" ސްކޫލް ރަސްމީކޮށް ހުޅުވައި ކިޔަވަދޭން ފަށައިފި އެވެ.

މި ސްކޫލް ރަސްމީކޮށް ހުޅުވައިދެއްވީ، ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެވެ. 2023 ވަނަ އަހަރުގެ ޑިސެމްބަރު މަހުގެ 23 ވަނަ ދުވަހު ބިންގާ އެޅި މި ސްކޫލްގެ މަސައްކަތް އެއްކޮށް ނިންމާފައިމިވަނީ ދެ އަހަރެއްހާ ދުވަހުގެތެރޭގަ އެވެ. 1900 އަށްވުރެ ގިނަ ދަރިވަރުންނާއެކު މިއަދު ކިޔަވައިދޭންފެށި ޝަހީދު އަލީ ސްކޫލްގައި 230 މުދައްރިސުން ކިޔަވައިދޭނެ އެވެ.

މި ސްކޫލްގައި މަލްޓިޕާޕަސް ހޯލަކާއި، ޒަމާނީ ވަސީލަތްތަކުގެ އިތުރުން ޓާފްދަނޑަކާއި އިންޑޯ ކުޅިވަރުތައް ކުޅޭވޭނެ އިންތިޒާމްތައް ވެސް ވަނީ ހަމަޖައްސާފަ އެވެ. މި ސްކޫލަކީ 1،500 ކުދިންގެ ޖާގައިގެ ސްކޫލެއް ނަމަވެސް ދެ ދަންފަޅިއަށް ކިޔަވައިދޭނަމަ 2500 ކުދިންނަށް ކިޔަވައިދެވޭނޭކަމަށް އެޑިއުކޭޝަން މިނިސްޓްރީިން ބުންޏެވެ.

ގްރޭޑް 1-10 އާ ހަމައަށް ކިޔަވައިދޭން ނިންމާފައިވާ ޝަހީދު އަލީ ސްކޫލުގައި 32 ކުދިންގެ ޖާގައިގެ 54 ކްލާސްރޫމު ހިމެނެ އެވެ. އަދި 400 ކުދިންގެ އޮޑިޓޯރިއަމަކާއި ލައިބްރަރީ އާއި ކޮމްޕިއުޓަރު ލެބާއި 3 ސައިންސް ލެބްވެސް ހިމެނޭނެ އެވެ.