އަންނަ އޭޕްރީލް މަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ސަރުކާރަށް އެއްބާރުލުން ނުދޭ ކެންޑިޑޭޓުން ހޮވައިފި ނަމަ ގެއްލުން ވާނީ ރައްޔިތުންނަށް ކަމަށް ފަސްޓް ލޭޑީ މެޑަމް ސާޖިދާ މުހައްމަދު ވިދާޅުވެއްޖެ އެވެ.
އެކަމަނާ މިފަދައިން ވިދާޅުވީ، މާފަންނު ދެކުނު ދާއިރާގެ ކެމްޕެއިން ޖަގަހަ ހުޅުވުމަށް ރޭ ބޭއްވި ޖަލްސާގައި ވާހަކަދައްކަވަމުން ނެވެ. މެޑަމް ސާޖިދާ ވިދާޅުވި ގޮތުގައި ރެޔާއި ދުވާލު މަސައްކަތްކުރައްވަމުންދާ ވެރިޔަކާ އެކީގައި މަސައްކަތްކުރާނެ ކެންޑިޑޭޓުން ހޮވުމަކީ ކޮންމެހެން ކުރަންޖެހޭނެ ކަމެއް ކަމަށެވެ. އަދި ސަރުކާރާ ދެކޮޅަށް މަސައްކަތްކުރުމުގެ ވިސްނުމުގައި އަންނަ ނަމަ، ރައްޔިތުންނަށް ވާނެ އެއްވެސް ފައިދާއެއް ނޯންނާނެ ކަމަށް އެކަމަނާ ވިދާޅުވި އެވެ.
"އެތައް ގޮންޖެހުންތަކެއް އޮތް ގައުމެއްގައި ވަރަށް އުނދަގޫ ނިންމުންތަކެއް ނިންމަވަމުން ރައީސް ވަޑައިގަންނަވާ އިރު، އެ ސަރުކާރަކަށް އެއްބާރުލުންދޭނެ ބަޔަކު ނުހޮވައިފި ނަމަ، އޭގެ ގެއްލުން ހުރިހާ ރައްޔިތުންނަށް ކުރާނެ. އެއީ ހަމަ ޔަގީން ވެސް ކަމެއް،" މެޑަމް ސާޖިދާ ވިދާޅުވި އެވެ.
މާފަންނު ދެކުނު ދާއިރާގަ ގިނަ ދުވަސްތަކެއް ވަންދެން އުޅުއްވި މެޑަމް ސާޖިދާ ވިދާޅުވީ، އެ ދާއިރާއަށްް ކުރިމަތިވި ގޮންޖެހުންތަކަށް ހައްލު ހޯދުމަށް މަސައްކަތް ކުރެއްވީ ރައީސް މުއިއްޒު ކަމަށެވެ. އެހެންވެ، އެފަދަ ވެރިއަކާއި އެކު މަސައްކަތް ކުރާނެ ކައުންސިލަރުންތަކަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުންތަކެއް އަދި މޭޔަރެއް ހުންނެވުމަކީ މުހިންމުކަމެއް ކަމަށާއި، މި ސަރުކާރާ ދެކޮޅު ވިސްނުމެއްގައި މަސައްކަތް ކުރައްވާނެ ކެންޑިޑޭޓުންތަކެއް ހޮވައިގެން ވާނެ ފައިދާއެއް ނެތް ކަމަށް އެކަމަނާ ވިދާޅުވި އެވެ.
