ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި ވާދަކުރުމަށް މިހާތަނަށް 1،300 އަށްވުރެ ގިނަ ފޯމު ބަލައިގެންފައިވާ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.

އިލެކްޝަންސް ކޮމިޝަނުން ބުނިގޮތުގައި، އިއްޔެގެ ނިޔަލަށް 1،324 ކެންޑިޑޭޓެއްގެ ކެންޑިޑެސީ އެެ ކޮމިޝަނުން ބަލައިގަނެފައިވެ އެވެ. އެއީ ލޯކަލް ކައުންސިލު އިންތިހާބުގައި ވާދަކުރާ 750 ކެންޑިޑޭޓުންނާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ވާދަކުރާ 474 މީހެއްގެ ކެންޑިޑޭޓުންނެވެ.

ކެންޑިޑެސީ ގަބޫލުކުރި 1،324 ގެ ތެރެއިން 1،105 ކެންޑިޑޭޓުން ސިޔާސީ ޕާޓީތަކުގެ ފަރާތުން ވާދަކުރަން ނިންމާފައިވާއިރު އިންތިހާބުގައި ވާދަކުރުމަށް ފޯމު ހުށަހެޅި ފަރާތްތަކުގެ ތެރެއިން 309 ފަރާތެއްގެ ކެންޑިޑެސީ ވަނީ ގަބޫލު ނުކުރުމަށް ނިންމާފަ އެވެ. އޭގެ ތެރޭގައި ހިމެނެނީ ލޯކަލް ކައުންސިލްގައި ވާދަކުރަން ފޯމު ހުށަހެޅި 183 ފަރާތަކާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް ވާދަކުރުމަށް ފޯމު ހުށަހެޅި 126 ފަރާތެކެވެ.

މިފަހަރުގެ ލޯކަލް ކައުންސިލް އިންތިހާބުގައި ލޯކަލް ކައުންސިލުތަކުގެ މަގާމަށް 678 މެންބަަރުން ކުރިމަތިލާނެ އެވެ. އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މަގާމަށް 678 މެންބަރުން ކުރިމަތިލާނެ އެވެ.

މި އިންތިހާބުގައި ވޯޓުލުމުގެ ހައްގު ލިބިފައިވަނީ ޖުމްލަ 249،937 މީހަކަށެވެ. އެއީ 144،527 އަންހެނުންނާއި، 150،410 ފިރިހެނުންނެވެ. ވޯޓުލުމުގެ ހައްގު ލިބިފައިވާ މީހުންގެ ލިސްޓަށް ޝަކުވާ ހުށަހެޅުމުގެ ފުރުސަތުވެސް މިހާރު ވަނީ ހުޅުވާލާފަ އެވެ. އެގޮތުން، ޝަކުވާ ހުށަހަޅަން ބޭނުންވާ ފަރާތްތަކުން މި މަހުގެ 18 ވަނަ ދުވަހުގެ މެންދުރުފަހު 3:00 ގެ ކުރިން މައިޕޯޓަލް (my.elections.gov.mv) މެދުވެރިކޮށް ޝަކުވާ ހުށަހެޅޭނެ އެވެ. އަދި ސިޔާސީ ޕާޓީތަކުން ޝަކުވާ ހުށަހަޅަންޖެހޭނީ އެ ފަރާތްތަކަށް ހާއްސަކުރެވިފައިވާ "ސިމެދަ ޕޯޓަލް" މެދުވެރިކޮށް ކަމަށްވެސް އީސީން ބުނެފައިވެ އެވެ.