ސިއްހީ ދާއިރާގެ ގައިޑްލައިންތަކާއެކު ކޮންމެ ސަރަޙައްދެއްގައި ހުންނަ ބަލި މީހަކަށްވެސް އެއް ކޮލެޓީއެއްގައި ފަރުވާ ދެވޭކަން ކަށަވަރުވާނެ ކަމަށް ހެލްތް މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެ އެވެ.

މިނިސްޓަރު މިފަދައިން ވިދާޅުވެފަ ވަނީ، "ތަރުޖަމާނާ އެކު ޕޮޑްކާސްޓް" ގައި ވާހަކަ ދައްކަވަމުންނެވެ. މިނިސްޓަރު ވިދާޅުވީ، ސިއްހީ ދާއިރާގެ ހިދުމަތްތައް ހަރުދަނާ ކުރުމަށް މިދިޔަ އަހަރު އެކަނިވެސް 41 ގައިޑްލައިން އެކުލަވާލާފައިވާ ކަމަށެވެ. އެގޮތުން، މި ގައިޑްލައިންތަކާއެކު ކޮންމެ ސަރަހައްދެއްގައި ހުންނަ ބަލި މީހަކަށްވެސް އެއް ކޮލެޓީއެއްގައި ފަރުވާ ދެވޭނެކަމަށް ވިދާޅުވި އެވެ.

މިނިސްޓަރު އިތުރަށް ވިދާޅުވީ، ސިއްހީ ނިޒާމާ ދޭތެރޭ ރައްޔިތުންގެ އިތުބާރު އޮތުމަކީ ވަރަށް މުހިންމު ކަމެއް ކަމަށާއި، އެ އިތުބާރު އުފެދޭނީ، އެކަމުގެ އެސްއޯޕީސްތައް ރަނގަޅަށް އެކުލަވާލައިގެން ކަމަށެވެ. މީގެއިތުރުން ސިއްހީ ނިޒާމުގައި އަމަލުކުރާ ސްޓޭންޑާޑްތަކަކީ ބައިނަލްއަގުވާމީ ގޮތުން ބަލައިގަނެފައިވާ ނިޒާމްތަކަށް ވާންޖެހޭ ކަމަށްވެސް މިނިސްޓަރު ވިދާޅުވި އެވެ. އެގޮތުން ރާއްޖޭގެ ސިއްހީ ނިޒާމުގެ ޓްރީޓްމެންޓް ގައިޑްލައިންތަށް ހަރުދަނާކޮށް މި ގައިޑްލައިން ތަކަށް މީހުން ތަމްރީނުކުރަމުން ދާކަމަށް މިނިސްްޓަރު ވިދާޅުވި އެވެ.

"ވޭތުވެދިޔަ އަހަރު އެކަނިވެސް އަޅުގަނޑުމެން 41 ޓްރީޓްމަންޓް ގައިޑްލައިން އެކުލަވާލައިފިން. އަދި މިއަހަރުގެ ބަޖެޓުގައިވެސް އިތުރަށް ޓްރީޓްމަންޓް ގައިޑްލައިންތައް އެކުލަވާލާ، އެއަށް ބޭނުންވާ މީހުން ތަމްރީން ކުރާނެ." މިނިސްޓަރު ވިދާޅުވި އެވެ.

މިނިސްޓަރު ވިދާޅުވި ގޮތުގައި މިގޮތަށް ގައިޑްލައިން ހަރުދަނާ ކުރުމުން، މި ގައިޑްލައިން ތަކުގެ ދަށުން ކޮންމެ ސަރަހައްދެއްގައި ހުންނަ ބަލި މީހަކަށްވެސް އެއް ގޮތަކަށް ފަރުވާ ލިބިގެންދާނެ އެވެ.