ތައުލީމަކީ ދެމެހެއްޓެނިވި ތަރައްގީއާއި ކުރިއެރުމުގެ މައިބަދަ ކަމަށާއި، ގައުމީ ތަރައްގީގެ އެންމެ މުހިންމު ބިންގާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވީ، އިންޓަނޭޝަނަލް އެޑިއުކޭޝަން ޑޭގެ މުނާސަބަތުގައި ސޯޝަލް މީޑިއާގަ ކުރެއްވި ޕޯސްޓެއްގަ އެވެ. ރައީސް ވިދާޅުވީ، ތައުލީމީ ދާއިރާ ބައްޓަންކުރުމުގައި ޒުވާނުންގެ ބައިވެރިވުން އިތުރުކޮށް، ބާރުވެރިކުރުވުމަށް ސަރުކާރުން އިސްކަންދޭނެ ކަމަށެވެ. އަދި އުނގެނުމުގެ މާހައުލަކީ އެންމެނަށް ބައިވެރިވެވޭ، ޒަމާނާ ގުޅޭ ނިޒާމަކަށް ހެދުމަށް މަސައްކަތްކުރައްވާނެ ކަމުގެ ޔަގީންކަންވެސް އެމަނިކުފާނު ދެއްވި އެވެ.

މީގެއިތުރުން، ގައުމީ ތަރައްގީގައި ތައުލީމުގެ މުހިންމުކަން ފާހަގަކުރައްވަމުން ރައީސް ވިދާޅުވީ، މި ސަރުކާރަކީ ތައުލީމީ ފުރުސަތުތައް ފަހިކޮށްދިނުމަށް ނުހަނު ބޮޑު އަހައްމިއްޔަތުކަމެއް ދޭ ސަރުކާރެއް ކަމަށެވެ. އެގޮތުން، ވޭތުވެދިޔަ ދެ އަހަރުގެ ތެރޭގައި ހިލޭ ފުރަތަމަ ޑިގްރީ ސްކީމްގެ ދަށުން 6,000 އަށްވުރެ ގިނަ ދަރިވަރުން ދަސްވެނިވެފައިވާކަމާއި، ދަރިވަރުންގެ މަތީ ތައުލީމަށްޓަކައި އެއް ބިލިއަނަށްވުރެ ގިނަ ރުފިޔާގެ ލޯނު ދޫކުރެވިފައިވާކަން އެމަނިކުފާނު ފާހަގަކުރެއްވި އެވެ.

ރައީސް އިތުރަށް ވިދާޅުވީ، ސަރުކާރުގެ އަމާޒަކީ ހަމައެކަނި ތައުލީމީ ފުރުސަތުތައް އިތުރުކުރުން ނޫން ކަމަށާއި، އެންމެހައި ރައްޔިތުންނަށް ހަމަހަމަ ފުރުސަތުތަކެއް ހޯދައިދީ، އުފާވެރި އަދި ތަނަވަސް ގައުމެއް ބިނާކުރުން ކަމަށެވެ. އަދި ކޮންމެ ދަރިވަރަކީވެސް އަމިއްލަ ނަފްސާއި މުޖުތަމައުގެ ކުރިއެރުމުގައި މުހިންމު ދައުރެއް އަދާކުރެވޭނެ ފަދަ ގާބިލު މީހަކަށް ހެދުމަށް ސަރުކާރުން މެދުނުކެނޑި މަސައްކަތް ކުރަމުންދާނެ ކަމަށްވެސް އެމަނިކުފާނު ވިދާޅުވި އެވެ.