ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭގައި ތަރައްގީކޮށްފައިވާ އަމާން ދޯދި ޓަވަރުގެ ތެރެއިން 'ދޯދި 1′ ހައުސިން ކޮމްޕްލެކްސްގެ ކުނި އަޅާ ނިޒާމާ ބެހޭ ގޮތުން ފަތުރަނީ ދޮގު ހަބަރު ކަމަށް އެ ކުންފުނިން ބުނެފި އެވެ.
އެފްޑީސީން މިހެން ބުނެފައި ވަނީ އިއްޔެ ހިނގި އަލިފާނުގެ ހާދިސާއާ ގުޅިގެންނެވެ. އެގޮތުން،، މި ހާދިސާގެ ހަގީގަތް އޮޅޭގޮތަށް ދޮގު މައުލޫމާތު ފަތުރަމުންދާކަން ފާހަގަކޮށް، އެފްޑީސީން ވަނީ އެކަމާ މެދު ކަންބޮޑުވުން ފާޅުކޮށްފަ އެވެ. ހާއްސަކޮށް، އިމާރާތުގެ ވެންޓިލޭޝަން ޝާފްޓްތަކާއި ކުނި އުކާލުމުގެ ނިޒާމާ ގުޅުވައިގެން ފަތުރަމުންދާ ވާހަކަތަކަކީ އެއްވެސް އަސާސެއް ނެތް ދޮގު މައުލޫމާތުތަކެއް ކަމަށް އެ ކޯޕަރޭޝަނުން ބުންޏެވެ.
މީގެއިތުރުން، އެފްޑީސީން ވަނީ، ކަށަވަރުނުކުރެވޭ މައުލޫމާތު ނުފެތުރުމަށާއި، މިފަދަ ނުރައްކާތެރި ހާދިސާތައް ކުރިމަތިވެދާނެ ކަންކަމުން ދުރުހެލިވެ، ހުރިހާ ފަރާތްތަކުންވެސް ޒިންމާދާރުކަމާއެކު އަމަލުކުރުމަށް އިލްތިމާސްކޮށްފަ އެވެ. އަދި ކުނި އުކާލުމަށް ހާއްސަކުރެވިފައިވާ ސަރަހައްދު ފިޔަވައި އެހެން ތަންތަނަށް ކުނި އުކާލުމަކީ މަނާކަމެއްކަމަށް ވެސް އެފްޑީސީން ވަނީ ބުނެފަ އެވެ.
މި އަލިފާނުގެ ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެ އެވެ. އަދި މިހާރު އެ ސަރަހައްދުގެ ރައްކާތެރިކަން ކަށަވަރުކޮށް، އަލިފާން ރޯވާން މެދުވެރިވި ސަބަބު ދެނެގަތުމަށް ބޭނުންވާ އިންސްޕެކްޝަންތައް ކުރިޔަށް ގެންދާ ކަމަށް އެފްޑީސީން ބުންޏެވެ.
