ކުރީގެ ރައީސް އަބްދުﷲ ޔާމީންގެ ވެރިކަމުގައި މޯލްޑިވްސް ގޭސް ޕްރައިވެޓް ލިމިޓެޑު (މޯލްޑިވް ގޭސް)ގެ މެނޭޖިން ޑިރެކްޓަރަކަށް ހުންނެވި، އަބްދުﷲ މައުމޫން (ގޭސް މާނު) ގެ މައްޗަށް އުފުލި ރިޝްވަތު ހިފުމުގެ 5 ދައުވާއެއް ސާބިތުނުވާ ކަމަށް ކްރިމިނަލް ކޯޓުން ކަނޑައަޅައިފި އެވެ.

މައުމޫންގެ މައްޗަށް ދައުލަތުން ރިޝްވަތު ހިފުމުގެ 7 ދައުވާއެއް ދައުލަތުން އުފުލި އެވެ. އެކަމަކު ކްރިމިނަލް ކޯޓުން ނިންމާފައިވަނީ އޭނާގެ މައްޗަށް އޭގެތެރެއިން 5 ދައުވާ ސާބިތުނުވާ ކަމަށެވެ.

މި މައްސަލައިގަ ޕީޖީން ނެރުނު ބަޔާނެއްގައި ބުނެފައިވަނީ އެ ދައުވާތައް ސާބިތުނުވާ ކަމަށް ނިންމީ ހުށަހެޅި ހެކިތަކަށް އެކަށީގެންވާ ގޮތެއްގައި ރިއާޔަތް ކުރުމެއްނެތި، ޝަރުޢީ އަދި ގާނޫނީ އުސޫލުތަކާ ހިލާފަށް އެ އޮފީހުން ދެކޭ ކަމަށެވެ. އެހެންވެ އެ ފަސް ދައުވާ ހައި ކޯޓުގައި އިސްތިއުނާފުކުރަން އެ އޮފީހުން ގަސްދުކުރާ ކަމަށް ޕީޖީން ބުންޏެވެ.

"ނަމަވެސް، މިކަމުގައި އެންމެ ފަހު ނިންމުމެއް ނިންމެން އޮތީ މައްސަލައިގެ ޝަރީޢަތް ނިމުނު ގޮތުގެ ފުރިހަމަ ރިޕޯޓު މި އޮފީހަށް ލިބުމުންކަމަށްވާތީ، އެ ރިޕޯޓް މި އޮފީހަށް ލިބުމުން އިސްތިއުނާފުކުރުމާމެދު ފަހު ނިންމުމެއް ނިންމާނަމެވެ." ޕީޖީން ބުންޏެވެ.

ބާކީ ދެ ދައުވާ ސާބިތުވެ އޭނާގެ މައްޗަށް ކޯޓުން ވަނީ 12 (ބާރަ) އަހަރާއި، 9 (ނުވައެއް) މަހާއި، 18 (އަށާރަ) ދުވަހަށް ޖަލަށްލުމަށް މިދިޔަ ސެޕްޓެމްބަރުގައި ހުކުމްކޮށްފަ އެވެ.

މައުމޫންގެ މައްޗަށް ދައުލަތުން ދައުވާ އުފުލީ މައުމޫނަށާއި އޭނާގެ އާއިލާ މީހުންނާއި އޭނާއާ ގުޅުން އޮންނަކަމަށް ތުހުމަތުކުރެވޭ ބައެއް ކުންފުނިތަކަށް މޯލްޑިވް ގޭސްގެ ސަޕްލަޔަރެއް ކަމަށްވާ ތްރީ.ޑީ.އެޗް އިންޓަރނޭޝަނަލުން ފައިސާ ފޮނުވާފައިވާ ކަމަށް ތުހުމަތުކުރެވޭ މައްސަލައިގަ އެވެ. މި މުއާމަލާތްތަކުން ރިޝްވަތުގެ ގޮތުގައި މައުމޫނާއި އޭނާއާ ގުޅުންހުރި އެކައުންޓުތަކަށް 298،403.5 އެމެރިކާ ޑޮލަރު ޖަމާކޮށްފައިވާ ކަމަށް ދައުލަތުން ވަނީ ބުނެފަ އެވެ.