ކުރިއަށް އޮތް ރޯދަ މަހު ސްކޫލްތަކުގައި ކިޔެވުން އޮންނާނީ ފުރަތަމަ ހަފުތާގައި އެކަނި ކަމަށް އެޑިއުކޭޝަން މިނިސްޓްރީން ބުނެފި އެވެ.
އެޑިއުކޭޝަން މިނިސްޓްރީން އާންމުކުރި މިއަހަރުގެ ދިރާސީ ކަލަންޑަރުގައިވާ ގޮތުން، މި އަހަރުގެ ކިޔެވުން ފެށުމަށް ހަމަޖެހިފައިވަނީ ކުރިއަށް އޮތް އަންގާރަ ދުވަހު އެވެ. މި ކަލަންޑަރުގައި ސަރުކާރު ބަންދު ދުވަސްތަކާއި، ކިޔަވައިދޭ ދުވަސްތަކުގެ އިތުރުން ދަރިވަރުންނާއި މުދައްރިސުންނަށް ލިބޭ ބަންދު ދުވަސްތައް ވަނީ ތަފްސީލުކޮށް ބަޔާންކޮށްފަ އެވެ.
ކަލަންޑަރުގައިވާ ގޮތުން މި އަހަރުގެ ރޯދަ މަހުގެ ފުރަތަމަ ހަފުތާ އަށް ފަހު ސްކޫލްތަކުގެ ކިޔެވުން މެދުކަނޑާލުމަށް ފަހު، އަލުން ކިޔެވުން ފަށާނީ މާޗް 23 ގަ އެވެ. ރޯދަ މަހުގެ ފުރަތަމަ ހަފުތާއަށްފަހު، މާޗް 1 އިން 8 އަށް ކަނޑައަޅާފައިވަނީ މުދައްރިސުންގެ ފަންނީ ތަރައްގީއަށް ހާއްސަ (ޕީޑީ) ދުވަސްތަކެއްގެ ގޮތުގަ އެވެ. އެހެންވެ އެ މުއްދަތުގައި ދަރިވަރުން ސްކޫލަށް ހާޒިރުވާކަށް ނުޖެހޭނެ އެވެ.
ޕީޑީ ދުވަސްތަކަށްފަހު ދެން ބައްދަލުކުރާނީ ރޯދަ މަހުގެ ފަހު ދިހަ އެވެ. އެ ދުވަސްތަކަކީ ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅާފައިވާ ދުވަސްތަކެއް ކަމުން، އެ މުއްދަތުގައިވެސް ދަރިވަރުންނަށް ކިޔެވުމެއް ނޯންނާނެ އެވެ.
