ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ފަރާތުން ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވާދަކުރާ ކެންޑިޑޭޓުންގެ ޑޯޓު ޑޯ ކެމްޕެއިން ފަށައިފި އެވެ.

މި ހަރަކާތްތައް ރަސްމީކޮށް އިފްތިތާހްކޮށްފައިވަނީ މިއަދު ހެންދުނު 9:00ގަ ކޮންގްރެސް ޕާޓީގެ މައި އިދާރާގައި ބޭއްވި ހާއްސަ ރަސްމިއްޔާތެއްގަ އެވެ.

މި ހަރަކާތް ފައްޓަވާ ދެއްވާފައި ވަނީ ޕީއެންސީގެ ޕީޖީ ލީޑަރު އަދި ކައުންސިލް އިންތިހާބުގައި ޕީއެންސީގެ ކެމްޕޭން މެނޭޖަރު އިބްރާހިމް ފަލާހެވެ. މީގެއިތުރުން، މި ރަސްމިއްޔާތުގައި ސަރުކާރުގެ ބައެއް ވަޒީރުންނާއި، ޕާޓީގެ އިސް ބޭފުޅުންގެ އިތުރުން އިންތިހާބުގައި ވާދަކުރައްވާ ކެންޑިޑޭޓުންވެސް ބައިވެރިވެވަޑައިގެންނެވި އެވެ.

މި ރަސްމިއްޔާތުގަ ވާހަކަދައްކަވަމުން ފަލާހު ވިދާޅުވީ، ޕީއެންސީގެ މޭޔަރު ކެންޑިޑޭޓު، މޫސާ އަލީ ޖަލީލަކީ ރައީސް ޑރ. މުހައްމަދު މުއިއްޒު ނަމޫނާއަކަށް ބައްލަވައިގެން އެމަނިކުފާނު އެ ހިންގެވި މަގުން ހިންގެވުމަށް އެގޮތަށް ކުރިއަށްވަޑައިގަންނަވާނެ ބޭފުޅެއް ކަމަށެވެ. އަދި ލޯކަލް ކައުންސިލްގެ އިންތިހާބަށް ޕީއެންސީގެ ފަރާތުން، ރާއްޖޭގެ އެކި ކަންކޮށްޅުތަކަށް ވަރަށް ގިނަ މެންބަރުން ކުރިމަތިލާ ކަމަށާއި މިއަދު ފަށާފައި މިވާ ޑޯޓު ޑޯގެ ދަށުން ރާއްޖޭގެ ހުރިހާ ކަންކޮޅުތަކުން ގޮޑިތަަކަށް ކުރިމަތިލާ އެ ޕާޓީގެ މެންބަރުން ވެސް މިއަދުން ފެށިގެން މި ހަރަކާތް ހުރިހާ ރަށެއްގަ ވެސް ކުރިއަށް ގެންދާނެ ކަމަށް ފަލާހު ވިދާޅުވި އެވެ.

މިއަދު މިހަރަކާތުގެ ތެރެއިން މޭޔަރު ކަމަށްލާ، މޫސާ އަލީ ޖަލީލާއި، ހުޅުމާލެ ދެކުނު ދާއިރާގެ ކައުންސިލް މެމްބަރުކަމަށް ކުރިމަތިލެއްވި އަހުމަދު އުބެއިދާއި މާލެ ސިޓީގެ އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ އަލައިކާ އަދުނާން ވަނީ ގެތަކަށް ޒިޔާރާތްކޮށްފަ އެވެ.