ގުދުސްގައި ހުންނަ ފަލަސްތީނުގެ ރެފިއުޖީންނަށް އެހީ ފޯރުކޮށްދޭ އދ. ގެ ޖަމިއްޔާއެއް ކަމަށްވާ އަންރުވާގެ އިމާރާތްތަކެއް އިޒްރޭލުން ހަލާކުކޮށްލި މައްސަލަ ދިވެހި ސަރުކާރުން ކުށްވެރިކޮށްފި އެވެ.
ފޮރިން މިނިސްޓްރީން ބުނި ގޮތުގައި، މިފަދަ އަމަލުތަކަކީ ބައިނަލްއަގުވާމީ ގާނޫނުތަކާ ކަނޑައެޅިގެން ހިލާފު، އދ. އާއި އިންސާނީ އެހީ ފޯރުކޮށްދޭ އިދާރާތަކުގެ މަސައްކަތްތަކަށް ހުރަސްއެޅޭ ފަދަ ކަމެއް ކަަމަށެވެ. މީގެ ސަބަބުން ފަލަސްތީނުގެ ރައްޔިތުން ތަހައްމަލު ކުރަމުންދާ ނިކަމެތި ހާލަތު އިތުރަށް ގޯސްވެގެންދާނެ ކަމަށާއި، މިއީ އައިސީޖޭއިން ނެރެފައިވާ އަމުރުތަކާވެސް ހިލާފު އަމަލެއް ކަމަށް ބުންޏެވެ.
މީގެއިތުރުން ފަލަސްތީނުގެ ރައްޔިތުންނަށް ކޮންމެހެން ބޭނުންވާ އަސާސީ އެހީތެރިކަމާއި ރައްކާތެރިކަން ފޯރުކޮށްދިނުމުގައި އުންރުވާއިން އަދާކުރާ މުހިންމު ދައުރަށް ރާއްޖެއިން ފުރިހަމައަށް ތާއީދުކުރާކަން ދިވެހި ސަރުކާރުން ވަނީ ހާމަކޮށްފައެވެ. އަދި ބައިނަލްއަގުވާމީ ގާނޫނުތަކާ ހިލާފަށް އިޒްރޭލުން ހިންގަމުންދާ ލާއިންސާނީ އަމަލުތަކަށް ޖަވާބުދާރީކުރުވުމަށް ބާރުއަޅާ، މިފަދަ އަމަލުތައް ހުއްޓުވުމަށް މިހާރުން މިހާރަށް ވެސް ދިވެހިރާއްޖެއިން ވަނީ ބައިނަލްއަގުވާމީ މުޖުތަމައަށް ގޮވާލާފަ އެވެ.
