ކޮވިޑް-19 އާ ގުޅިގެން ރާއްޖޭގައި ފުޅާ ދާއިރާއެއްގައި ޕީސީއާރް ޓެސްޓިންގެ ހިދުމަތް ފޯރުކޮށްދިން ދެ ކުންފުންޏަކުން ޓެކުހަށް މަކަރު ހަދައި، 134 މިލިއަން ރުފިޔާގެ އާމްދަނީ ފޮރުވި މައްސަލައިގައި ދައުވާ ކުރުމަށް ކްރިމިނަލް ކޯޓަށް ހުށަަހަޅައިފި އެވެ.

ކޮވިޑް ދުވަސްވަރު ރާއްޖޭގައި ފުޅާ ދާއިރާއެއްގައި ޕީސީއާރު ޓެސްޓިންގެ ހިދުމަތް ފޯރުކޮށްދެމުންދިޔަ ދެ ކުންފުނި ކަމުގައިވާ ޕައިނިއާ މޯލްޑިވްސް ޕްރައިވެޓް ލިމިޓެޑާއި އައިލެންޑް ހެލްތް ސޮލިއުޝަންސް ޕްރައިވެޓް ލިމިޓެޑުން ޓެކުހަށް މަކަރު ހަދާފައިވާކަމަށް ތުހުމަތުކުރެވޭތީ އެ މައްސަލަ ތަހުގީގުކޮށް، ދައުވާކޮށްދިނުމަށް ޕްރޮސެކިއުޓާ ޖެނެރަލް (ޕީޖީ)އަށް ހުށަހެޅީ ދައުލަތުގެ ޓެކްސް އިދާރާ މީރާއިން ނެވެ. އެ ކުންފުނިތަކުގެ ޑިރެކްޓަރުން ކަމަށްވާ، ޑރ. އިކްލީލް ޝަރީފް އަދި ޑިރެކްޓަރު ޑރ. އަލީ އަބްދުﷲ ލަތީފުގެ މައްޗަށްވެސް ދައުވާކޮށްދިނުމަށް މީރާއިން އެދުނެވެ.

ޕީޖީ އޮފީހުން މިއަދު ބުނީ މި މައްސަލައިގައި ހިމެނޭ ކުންފުނިތަކުން ގަސްދުގައި 20 މިލިއަން ރުފިޔާގެ ޓެކުހެއް ދެއްކުމުން އެއްކިބާވެފައިވާ ކަމަށެވެ. އެ ދައުވާތައް ސާބިތުވެއްޖެ ނަމަ، ޕީޖީން ބުނިގޮތުގައި ޓެކްސްގެ ގޮތުގައި ދައްކަންޖެހޭ އަދަދުގެ ދެގުނަ ކަމަށްވާ 40.4 މިލިއަން ރުފިޔާއިން އެ ކުންފުނިތައް ޖޫރިމަނާކޮށްދިނުމަށް އެ އޮފީހުން ކޯޓުގައި އެދޭނެ އެވެ.

އައިލެންޑް ހެލްތު ސޮލިއުޝަންސް އަދި ޕައިނިއާ މޯލްޑިވްސްގެ މައްޗަށް ދައުލަތުން އުފުލާފައިވަނީ ޓެކްސް ދެއްކުމުން ގަސްދުގައި އެއްކިބާވުމުގެ ތިން ދައުވާއަކާއި ގާނޫނު ތަންފީޒުކުރުމަށް ހުރަސް އެޅުމާއި ދައުލަތުގެ މަސައްކަތްތަކަށް ދަތިކުރުމުގެ ދައުވާ އެވެ. އެ ކުންފުނިތަކުގެ ޑިރެކްޓަރުންނަށް ކުރަނީ:

އައިލެންޑް ހެލްތު ސޮލިއުޝަންސް ޑިރެކްޓަރަކަށް ހުންނެވި ޑރ. އަލީ އަބްދުﷲ ލަތީފްގެ މައްޗަށް ވެސް ޓެކްސް ދެއްކުމުން އެއްކިބާވުމުގެ ތިން ދައުވާއެއް ކޮށްފައިވެ އެވެ. ޕީޖީ އޮފީހުން ފާހަގަކުރި ގޮތުގައި، ކޮވިޑް-19 ގެ ދުވަސްވަރު އެ ކުންފުނިތައް ހިންގުމުގައި ލަތީފް އިސްކޮށް ހަރަކާތްތެރިވެފައިވާކަން ތަހުގީގަށް ވަނީ ކަށަވަރުވެފަ އެވެ..

ޕައިނިއާ މޯލްޑިވްސްގެ ޑިރެކްޓަރު ޑރ. އިކުލީލްގެ މައްޗަށް ވެސް ޓެކްސް ދެއްކުމުން ގަސްދުގައި އެއްކިބާވުމުގެ ތިން ދައުވާއެއް ކޮށްފައިވާނެކަމަށް ޕީޖީ އޮފީހުން ބުންޏެވެ. އިކުލީލަކީ އައިލެންޑް ހެލްތު ސޮލިއުޝަންސް އާއި ޕައިނިއާ މޯލްޑިވްސްގެ މެޖޯރިޓީ ހިއްސާދާރެކެވެ.

މީގެއިތުރުން އެ ދެ ކުންފުނީގެ ޓެކްސް ބަޔާންތައް ހުށަހެޅުމުގެ ޒިންމާއާ ހަވާލުވެ ހުރި އަލީ ފަޔާޒް، ބޯވެލި/ އދ. މާމިގިލި ގެ މައްޗަށް ވެސް ޓެކްސް ދެއްކުމުން ގަސްދުގައި އެއްކިބާވުމުގެ ފަސް ދައުވާއެއް ކޮށްފައިވެ އެވެ. އޭނާގެ މައްޗަށް އެ ދައުވާތައް ކުރީ ޕީޖީން ބުނިގޮތުގައި އެ ދެ ކުންފުނީގެ ޓެކްސް ބަޔާންތައް ހުށަހަޅާފައިނުވާތީ އެވެ.