އިސްލާމް މާއްދާ އިނގިރޭސިން ކިޔަވައިދިނުމަކީ މައްސަލައެއް ނޫން ކަމަށާއި، މި މާއްދާގެ މުގައްރަރު ދަރިވަރުންނަށް ފަސޭހައިން ފަހުމްވާ ގޮތަށް ބަދަލުކުރަންޖެހޭ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މިނިސްޓަރު މިފަދައިން ވިދާޅުވެފައި ވަނ،ީ ދަރިވަރުން ދިވެހި ބަހަށް ކޮށިވުމުގެ ސަބަބުން އިސްލާމް މާއްދާ އިނގިރޭސި ބަހުން ކިޔަވައިދިނުމާ ގުޅޭގޮތުން ލިޔެފައިވާ ހަބަރަކަށް އިޝާރާތްކޮށް ސޯޝަލް މީޑިއާގަ އެވެ. މިނިސްޓަރު ވިދާޅުވި ގޮތުގައި، އިސްލާމް މާއްދާގެ މުގައްރަރު މިހާރުގެ ކުދިންނަށް ވިސްނޭނެ ފަދަ ފަސޭހަ އިބާރާތްތަކަކުން އަލުން އެކުލަވައިލަން ޖެހޭ ކަމަށް ފެނިވަޑައިގަންނަވާ ކަމަށެވެ. އަދި، ދަރިވަރުންނަށް ބޮޑަށް ފަހުމް ވަނީ އިނގިރޭސިބަހުން ކަމަށްވާނަމަ، އެ މާއްދާ އިނގިރޭސިބަހުން ކިޔަވައިދިނުމަކީ އެއްވެސް މައްސަލައެއް އޮތް ކަމެއް ނޫން ކަމަށްވެސް މިނިސްޓަރު ވިދާޅުވި އެވެ.
މީގެއިތުރުން، ފޮތްތަކުގެ ފަރުމާ ނުވަތަ ލޭއައުޓަށް ބަދަލު ގެނެސް، އިސްލާމް މުގައްރަރުގައި ހިމެނޭ މުހިންމު ބައިތައް ދަރިވަރުންގެ އުމުރާއި ގްރޭޑްތަކާ ގުޅޭގޮތުން ތަރައްގީކުރަން ޖެހޭ ކަމަށްވެސް މިނިސްޓަރު ފާހަގަކުރެއްވި އެވެ. އަދި، އިސްލާމް މާއްދާގެ ތެރޭގައި ހިމެނޭ އެކި ދާއިރާތަކުގެ މައުލޫމާތުތައް، އެކި މަރުހަލާތަކަށް ވަކި މާއްދާތަކެއްގެ ގޮތުގައި ބަހާލަން ފެނިވަޑައިގަންނަވާނެ ކަމަށްވެސް މިނިސްޓަރު ވިިދާޅުވި އެވެ.
