ބިދޭސީން މަސައްކަތްކުރާ ވޯކް ސައިޓުތަކުގެ ތެރެއިން ޕްރޮޖެކްޓުގެ މުއްދަތު ހަމަވެފައިވާ ތަންތަން އަލުން ރަޖިސްޓްރީކުރަން ހޯމް މިނިސްޓްރީން އަންގައިފި އެވެ.
ހޯމް މިނިސްޓްރީން ނެރުނު ބަޔާނެއްގައި ބުނީ، ރާއްޖޭގައި ވަޒީފާ އަދާކުރުމަށްް ބިދޭސީންނަށް ބޭނުންވާ ހުއްދަތައް ދޫކުރުމާއި ބިދޭސީންގެ ކަންކަން ބެލެހެއްޓުމުގެ ހަރުދަނާ ނިޒާމެއް ގާއިމްކުރަން އެ މިނިސްޓްރީއިން ދަނީ ގިނަ މަސައްކަތްތަކެއް ކުރަމުން ކަމަށެވެ.. އެގޮތުން، ރާއްޖޭގައި ވަޒީފާ އަދާކުރަން ބިދޭސީން ގެންނަން ޕްރޮޖެކްޓް އުސޫލުން ރަޖިސްޓަރީ ކޮށްފައިވާ ވޯކް ސައިޓްތަކުގެ ތެރެއިން، ޕްރޮޖެކްޓްގެ މުއްދަތު ހަމަވެފައިވާ ކަމަށް އެކްސްޕެޓް ސިސްޓަމްގެ ރިކޯޑްތަކުން ދައްކާ ސައިޓުތައް މިއަދުން ފެށިގެން "ޕެންޑިން ސައިޓް ކްލިއަރެންސް" އަށް ބަދަލުކުރާނެ ކަމަށް މިނިސްޓްރީން ބުންޏެވެ.
މީގެއިތުރުން، ރަޖިސްޓްރީކޮށްފައިވާ ވޯކް ސައިޓުގެ ތެރެއިން ކޯޓާއެއް ނުނަގައި އެއް އަހަރަށް ވުރެ ގިނަ ދުވަސްވެފައިވާ ސައިޓުތައް އަންނަ އާދިއްތަ ދުވަހުން ފެށިގެން "އިން-އެކްޓިވް" ސްޓޭޓަސް އަށް ބަދަލުކުރާނެ ކަމަށް ވެސް މިނިސްޓްރީއިން ވަނީ ބުނެފަ އެވެ. އަދި މުއްދަތު ހަމަވެފައިވާ ވޯކް ސައިޓްތައް އަލުން އެކްޓިވޭޓް ކުރުމަށް، މުއްދަތު ހަމަވެފައިވާ ލިޔެކިއުންތައް އާކުރަން އަންގާ، ލިޔުން އަޕްޑޭޓް ކުރަން ޖެހެނީ އެކްސްޕެޓް ސިސްޓަމް މެދުވެރިކޮށް ކަމަށް މިނިސްޓަރީއިން މައުލޫމާތު ދިނެވެ.
އެހެންކަމުން، މުއްދަތު ހަމަވެފައިވާ ވޯކް ސައިޓުތައް އަލުން އެކްޓިވޭޓް ކުރުމަށް ލިޔެކިޔުންތައް އާ ކުރުމަށްފަހު އެކްސްޕެޓް ސިސްޓަމް މެދުވެރިކޮށް ވޯކް ސައިޓުގެ ޑޮކިއުމަންޓު އަޕްޑޭޓުކުރުމަށް މިނިސްޓްރީއިން ވަނީ އިލްތިމާސްކޮށްފަ އެވެ.
މި ސަރުކާރުން ދަނީ ބިދޭސީންގެ މައްސަލަ ހައްލުކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން މިހާރު ކުރިޔަށް ދާ އޮޕަރޭޝަން ކުރަނގީގެ މައިގަނޑު މަގްސަދަކީ ދިވެހިރާއްޖޭގައި ދިރިއުޅޭ އެންމެހާ ބިދޭސީންގެ ބައޯމެޓްރިކް މައުލޫމާތު އެއްކޮށް، އެއް ޑޭޓާބޭސްއަކަށް ޖަމާކުރުމެވެ. މީގެ ސަބަބުން، ނުގަވާއިދުން ދިރިއުޅޭ ބިދޭސީންގެ މައްސަލަ ހައްލުކުރުމަށް ފަސޭހަވެ، ލޯކަލް ކައުންސިލްތަކަށް މި މައުލޫމާތު ލިބޭނެ އިންތިޒާމު ހަމަޖެހިގެންދާނެ އެވެ.
