ހުއްދަ ނުނަގާ ބޭސް އެތެރެކޮށް ވިއްކާ އޮންލައިން ޕޭޖްތަކުގެ މައްސަލަ ބަލަން ފަށައިފި ކަމަށް މޯލްޑިވްސް ފޫޑް އެންޑް ޑްރަގް އޮތޯރިތީ (އެމްއެފްޑީއޭ) އިން ބުނެފި އެވެ.
އެމްއެފްޑީއޭއިން ބުނި ގޮތުގައި، މިހާރަކަށް އައިސް އެ އިދާރާއިން ނަގަންޖެހޭ ހުއްދަތައް ނުނަގާ، އެކި ކަންކަމަށް ބޭނުންކުރާ ބޭސް އެތެރެކޮށް، ތަފާތު އޮންލައިން ޕޭޖުތަކުގައި އިޝްތިހާރު ކުރަމުންދާކަން ފާހަގަކުރެވެ އެވެ. އެގޮތުން، ލޭގައި ހަކުރު ހުންނަ މިންވަރު ދަށްކުރުމަށް ބޭނުންކުރާ ސެމަގުލުޓައިޑް އަކީ ބަރުދަން ލުއިކުރާ ބޭހެއް ކަމަށާއި، ހަމުގެ މައްސަލަތަކުގައި ބޭނުންކުރާ އެޒޭލެކް އެސިޑަކީ މޫނުގެ ހަންގަނޑު ރީތިކޮށް އަލިކުރާ ބޭހެއް ކަމަށް ބުނެ އޮންލައިން ޕޭޖްތަކުގައި އިޝްތިހާރުކޮށް ވިއްކަމުން ގެންދާކަަމަށް އެމްއެފްޑީއޭއިން ބުންޏެވެ.
މިފަދަ ބޭސްތަކަކީ ކޮންމެހެން ބޭނުންކުރަން ޖެހިއްޖެ ހާލަތުގައި އެކަމަށް ހާއްސަ ޑޮކްޓަރަކުގެ ލަފާގެ މަތިން ނޫނީ ބޭނުންކޮށްގެންވާނެ ބޭހެއް ނޫނެވެ. އަދި ފާމަސީތަކުން ވެސް މިފަދަ ބޭސްތަށް ދޫކުރެވޭނީ ހަމައެކަނި ޑޮކްޓަރެއްގެ ބޭސް ސިޓީއަށް ކަމަށާއި ޑޮކްޓަރުގެ ލަފަޔާ ނުލާ މިފަދަ ބޭސް ބޭނުންކުރުމުން ހީވެސް ނުކުރާ ފަދަ ހިތާމަވެރި ހާލަތަކަށް ހުށަހެޅިދާނެ ކަމަށް އެމްއެފްޑީއޭއިން ބުންޏެވެ.
އެހެންވެ ވިޔަފާރީގެ ގޮތުގައި ރާއްޖެއަށް ބޭސް އިމްޕޯޓްކޮށް ވިއްކަންޏާމުން ބޭހާއި ބެހޭ ގައިދުގައިވާ ގޮތުގެ މަތިން އެ އޮތޯރިޓީގައި ރަޖިސްޓްރީނުކޮށް އަދި ރާއްޖެއަށް އިމްޕޯޓްކޮށް ވިއްކުމަށް ހުއްދަ ދީފައިވާ ބޭހުގެ ލިސްޓްގައި ނުހިމެނޭ ބޭސް އެތެރެކޮށް، ވިއްކާ އިސްތިހާރު ކުރާނަމަ އެކަމާ ދެކޮޅަށް ފިޔަވަޅު އަޅާނެކަމަށް އެ އިދާރާއިން ބުންޏެވެ.
