މާލޭ ސިޓީގެ މޭޔަރު ކަމަށް ހޮވަންވާނީ، ރައީސް ޑރ. މުހައްމަދު މުއިއްޒުގެ ސްޕީޑުގައި މަސައްކަތް ކުރެވޭނެ ފަދަ މޭޔަރެއް ކަމަށް، ނައިބު ރައީސް ހުސެއިން މުހައްމަދު ލަތީފް ވިދާޅުވެއްޖެ އެވެ.
ނައިބް ރައީސް މިފަދައިން ވިދާޅުވީ، ޕީއެންސީގެ ފަރާތުން މާލެ ސިޓީ ކައުންސިލްގެ މޭޔަރުކަމަށް ވާދަކުރާ މޫސާ އަލީ ޖަލީލްގެ ކެމްޕެއިން އޮފީސް ހުޅުވުމަށް ރޭ ބޭއްވި ރަސްމިއްޔާތުގައި ވާހަކަފުޅުދައްކަވަމުން ނެވެ. އެމަނިކުފާނު ވިދާޅުވި ގޮތުގައި މާލޭގެ މޭޔަރު ކަމަށް ހޮވަންވާނީ، ރައީސްގެ ސްޕީޑުގައި މަސައްކަތް ކުރެވޭނެ، ގައުމީ ލޯބި ހުރި ބޭފުޅެކެވެ. އަދި، ކައުންސިލްތަކަކީ ސަރުކާރާ ގުޅިގެން މަަސައްކަތް ކުރަންޖެހޭ ތަންތަނަށް ވާތީ، ސަރުކާރަށް ހުރަސްއަޅައި، ދަތިކުރާ ބަޔަކު އިހްތިޔާރު ނުކުރުމަށް އިލްތިމާސްކުރެއްވި އެވެ.
"މޭޔަރަކު އިހުތިޔަރު ކުރުމުގައި އަޅުގަނޑުމެން އެދެނީ، މާލެ ސިޓީ ރައީސް ގެންގުޅުއްވި ތަސައްވަރުގައި ކުލަޖައްސާނެ މޭޔަރެއް ހޮވަން. އެއީ މި ސިޓީގައި މައްސަލަތައް ކިތަންމެހާވެސް ގިނަ، ކާރުބާރު ބޮޑު، އަޅުގަނޑުމެންގެ މާލެ ރައްޔިތުން އަމާންކަމާއި ސުލްހަ މަސަލަސްކަމާއެކު އުޅެވޭނެ ފަސްގަނޑަކަށް މި ފަސްގަނޑު ވާން އެބަ ޖެހޭ،". ނައިބް ރައީސް ވިދާޅުވި އެވެ.
މީގެއިތުރުން، ސަރުކާރާ ގުޅިގެން މަސައްކަތް ކުރާނެ ކައުންސިލަރުންތަކެއް ހޮވަން ރައީސް ވެސް ބޭނުވެވަޑައިގަންނަވާކަން ފާހަގަކުރަްވަމުން ނައިބު ރައީސް ވަނީ އެކަމަށް މަގުފަހިކޮށްދިނުމަށް އެދިވަަޑައިގެންފަ އެވެ. އަދި މޫސާ އަލީ ޖަލީލުގެ ހިދުމަތާއި ދޭތެރޭގައި އެއްވެސް ޝައްކު ނުކުރައްވާ ކަމަށާއި، ގައުމު ދެކެ ވާނެ ލޯތްބާއި، ރައްޔިތުންގެ އަމާންކަމާއި ތަރަައްގީއަށް މަސަތްކަތްކުރުމުގައި ރައީސް ޑރ. މުއިއްޒުގެ އަރިހުގައި އެއް ސްޕީޑްގައި މަސައްކަތް ކުރާނެ ކަމުގެ ޝައްކެއް ނެތް ކަމަށްވެސް ނައިބު ރައީސް ވަނީ ވިދާޅުވެފަ އެވެ.
