ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން، "އާއިލީ ބޯހިޔާވަހިކަން" ޕްރޮގްރާމްގެ އުސޫލުތަކާ އެއްގޮތަށް ބިމާއި ފުލެޓަށް އެޕްލައި ކުރަން މިއަދު ހުޅުވާލައިފި އެވެ.

ހައުސިން މިނިސްޓްރީން ވަނީ ގޯއްޗާއި ފްލެޓަށް އެދި ހިޔާވަހި ޕޯޓަލް މެދުވެރިކޮށް މިއަދު ހެނދުނު 9:00 އިން ފެށިގެން ކުރިމަތިލާން ވަނީ ހުޅުވާލާފަ އެވެ. އެގޮތުން، ފްލެޓަށް އެދި ކުރިމަތިލުމުގެ ފުރުސަތު އޭޕްރީލް 17 ވަނަ ދުވަހުގެ ރޭގަނޑު 11:59 އާ ހަމައަށް ވަނީ ހުޅުވާލާފަ އެވެ. އަދި ގޯއްޗަށް އެދި ހުށަހެޅުމުގެ ސުންގަޑިއަކީ މާޗު 4 ވަނަ ދުވަހުގެ ރޭގަނޑު 11:59 އެވެ. މި ޕްރޮގްރާމްގެ ދަށުން އެޕްލިކޭޝަން ހުށަހަޅަން ޖެހެނީ "ބޯހިޔާވަހިކަން ޕޯޓަލް" މެދުވެރިކޮށެވެ.

ބޯހިޔާވަހިކަމުގެ މި ޕްރޮގްރާމްގެ ދަށުން 7,900 ފްލެޓް ދޫކުރާނެ އެވެ. އެގޮތުން، މާލޭގެ ރަށްވެހިންނަށް 4,000 ފްލެޓް، 18 އަހަރުން ދަށުގެ ކުދިން ބަލާ އެކަނިވެރި މައިންނާއި އެކަނިވެރި ބަފައިންނަށް 100 ފްލެޓް އަދި ނުކުޅެދުންތެރިކަން ހުންނަ ފަރާތްތަކަށް ވަނީ 100 ފްލެޓް ކަނޑައަޅާފަ އެވެ. އަދި، ޒުވާނުންނަށް 250 ފްލެޓް ކަނޑައަޅާފައިވާއިރު މާލޭގައި އާއިލާ ބިނާކޮށްފައިވާ ޖުޑީޝިއަރީގެ މުވައްޒަފުންނަށް 100 ފްލެޓް އަދި ފުލުުހުންނާއި ސިފައިން އަދި ކަރެކްޝަންގެ މުވައްޒިފުންނަށް ހާއްސަކޮށް ކޮންމެ މުއައްސަސާއަކަށް 100 ފްލެޓް ވަނީ ކަނޑައަޅާފަ އެވެ.

މި އުސޫލުގެ ދަށުން މާލޭގެ ރަށްވެހިންނަށް ގޯތި ދޫކުރާނީ ގްރޭޓާ މާލެ ސަރަޙައްދާއި ރަސްމާލެއިންނެވެ. އަދި، މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ގޯތި ދޫކުރުމަށް ހަމަޖެހިފައިވަނީ ހަމައެކަނި ރަސްމާލެއިންނެވެ. ހުރިހާ ގޯއްޗެއްގެ ވެސް ބޮޑުމިނުގެ ގޮތުގައި ކަނޑައަޅާފައިވަނީ 1250 އަކަފޫޓެވެ.

މި އުސޫލު ބަދަލުކޮށްފައި ވަނީ، ރައީސް މާލޭގެ ރައްޔިތުންނާ އެކު ބޭއްވި ސިލްސިލާ ބައްދަލްވުންތަކުގައި ގިނަ ބަޔަކު ކުރިން ކަނޑައަޅާފައިވާ އުސޫލާ މެދު ކަންބޮޑުވުން ފާޅުކޮށްފައި ވުމުންނެވެ. އެކަށީގެންވާ ބޯހިޔާވަހިކަން ނެތް މީހުންނަށް، ބޯހިޔާވަހިކަން ފަހިކޮށްދިނުމަކީ މި ސަރުކާރުގެ އެންމެ މުހިއްމު އެއް ސިޔާސަތެވެ.