އަމިއްލަގޮތުން ހިންގާ 40 މީޑިއާއަކަށް، ދައުލަތުގެ ބަޖެޓުން 27.3 މިލިއަން ރުފިޔާގެ މާލީ އެހީ ދޫކޮށްފި އެވެ.

ރައީސް ރިޔާސީ އިންތިހާބު ކާމިޔާބު ކުރެއްވުމަށްފަހު އިންތިގާލީ މަރުހަލާގައި، ރާއްޖޭގެ ހުރިހާ މީޑިއާތަކާއެކު "މީޑިއާ ގުންޒަރު"ގެ ނަމުގައި ބޭއްވި މަޝްވަރާ ބައްދަލުވުމުގައި އެމަނިކުފާނު ވަނީ މީޑިއާގެ ކަންކަން ގެންދާނެގޮތުގެ ހިޔާލު ހޯއްދަވައި، މީޑިއާތަކަށް ދިމާވެފައިވާ ދަތިތަކަށް ހައްލު ހޯއްދަވައިދެއްވުމަށް މަސައްކަތްޕުޅު ކުރައްވާނެކަމުގެ ޔަގީންކަން މީޑިއާތަކަށް ދެއްވައިފަ އެވެ. އެ ވައުުދުފުޅުގެ ދަށުން މިއަދު ވަނީ ޝަރުތު ހަމަވި މީޑިއާތަކަށް ފައިސާ ދޫކޮށްފަ އެވެ.

މާލީ އެހީ ހޯދުމަށް ހުޅުވާލި ފުރުސަތުގައި ކުރިމަތިލި މީޑިއާތަކުގެ ތެރެއިން ޝަރުތު ހަމަވީ 41 މީޑިއާއަކަށެވެ. އެއް ކުންފުންޏަކުން ހިންގާ ދެ މީޑިއާއަކުން ވެސް އެހީއަށް ކުރިމަތިލިއިރު، ދައުލަތުން ފައިސާ ދޫކޮށްފައިވަނީ އެ ދެ މީޑިއާގެ ތެރެއިން އެއް މީޑިއާ ހިމަނައިގެން ޖުމްލަ 40 މީޑިއާ އަށެވެ.

މިކަމާ ގުޅިގެން ޔޫތު މިނިސްޓްރީން މިއަދު ބުނީ، މީޑިއާތަކަށް މާލީ އެހީތެރިކަން ދިނުމަށްޓަކައި މޯލްޑިވްސް މީޑިއާ އެންޑް ބްރޮޑްކާސްޓިން ކޮމިޝަން (އެމްއެމްބީސީ) އިން އެކުލަވާލި އުސޫލުގެ ދަށުން ޝަރުތު ހަމަވި 40 މީޑިއާއަކަށް ޖުމްލަ 27,295,532.69 ރުފިޔާ ދޫކޮށްފައިވާ ކަމަށެވެ. މީޑިއާ ތަކަށް ފައިސާ ދޫކޮށްފައި ވަނީ ފިނޭންސް މިނިސްޓްރީ މެދުވެރިކޮށެވެ.

މިއީ ރާއްޖޭގައި ދައުލަތުގެ ބަޖެޓުން އަމިއްލަ މީޑިއާތަކަށް މާލީ އެހީތެރިކަން ދޫކުރި ފުރަތަމަ ފަހަރެވެ.