ވޭސްޓް މެނޭޖްމެންޓް ކޯޕަރޭޝަން (ވެމްކޯ) އިން މުވައްޒަފުންގެ މުސާރައިން އުނިކުރާ ޕެންޝަން ފައިސާ ގަވާއިދުން ޖަމާނުކުރެވެނީ މާލެ ސިޓީ ކައުންސިލުން އެ ކުންފުންޏަށް ދޭންޖެހޭ 98 މިލިއަން ރުފިޔާ ނުލިބިވާތީ ކަމަށް އެ ކުންފުނިން ބުނެފި އެވެ.
އެގޮތަށް ވެމްކޯއިން ބުނެފައިވަނީ އެ ކުންފުނީގެ މުވައްޒަފުންގެ އެކައުންޓަށް ޕެންޝަން ޖަމާނުކުރާ ކަމަށް ބުނެ ބައެއް ނޫސްތަކުން ރިޕޯޓުކޮށްފައިވަނިކޮށެވެ.
ވެމްކޯގެ މުވައްޒަފުންގެ މުސާރައާއި އިނާޔަތް ދެމުން ގެންދަނީ އެ ކުންފުނިން ބުނިގޮތުގައި، އާމްދަނީގެ ގޮތުގައި ލިބޭ ފައިސާގެ އިތުރުން ސަބްސިޑީގެ ގޮތުގައި ލިބޭ މާލީ އެހީތެރިކަމާ އެކު އެވެ. އެކަމަކު، އެކި ފަރާތްތަކުންް އެ ކޯޕަރޭޝަނުން ހޯދި ހިދުމަތްތަކަށް ފައިސާ ލިބުމުގައި ދަތިތަކެއް ހުރިކަން ފާހަގަކޮށް، މާލެ ސިޓީ ކައުންސިލުން ވެމްކޯއަށް ދައްކަންޖެހޭ 98 މިލިއަން ރުފިޔާ އަދިވެސް ނުލިބޭ ކަމަށް ވެމްކޯއިން ބުންޏެވެ.
އެހެންވެ، އެތައް ފަހަރެއްގެ މަތިން މާލެ ސިޓީ ކައުންސިލާ ބައްދަލުކޮށް، މަޝްވަރާތައް ކޮށް، މި ފައިސާ ހޯދުމުގައި މިނިސްޓްރީ އޮފް ފިނޭންސްގެ އެހީތެރިކަމަށްވެސް އެދިފައިވާ ކަމަށް ވެމްކޯއިން ބުންޏެވެ. އަދި، މިހާރުވެސް އެ މިނިސްޓްރީއާއެކު މަޝްވަރާތައް ކުރިއަށްދާ ކަމަށާއި، ޕެންޝަން ފައިސާ ޖަމާކުރުމުގައި ހުރި ދަތިތަކާ ގުޅިގެން ޕެންޝަން އޮފީހާއެކު ވެސް މަޝްވަރާ ކުރަމުންދާ ވެމްކޯއިން ބުންޏެވެ.
