މަސްތުވާތަކެތި ޓްރެފިކް ކުރުމާއި މަނީ ލޯންޑަރިންގެ ބޮޑު ނެޓްވޯކެއް ހޯދައި، އެކަމުގައި އިސްކޮށް އުޅޭ ހަތަރު މީހަކު ފުލުހުން ހައްޔަރުކޮށްފި އެވެ.

މި ހަތަރު މީހުން ހައްޔަރުކޮށްފައި ވަނީ، 'އޮޕަރޭޝަން އަލިމަގު’ގެ ދަށުންނެވެ. މި އޮޕަރޭޝަން ވަނީ، މިދިޔަ އާދިއްތަ ދުވަހު މާލެ އާއި ގއ.ގެ ރަށްތަކުގަ ކުރިއަށް ގެންގޮސްފަ އެވެ. އަދި، އެ އޮޕަރޭޝަންގެ ދަށުން 10 ތަނެއް ބަލައިފާސްކޮށް، ގއ. ވިލިނގިލިން ހަތަރު މީހަކު ވަނީ ހައްޔަރުކޮށްފަ އެވެ.

ފުލުހުން ބުނި ގޮތުގައި، މި މައްސަލައާ ގުޅިގެން ހައްޔަރުކޮށްފައިވަނީ ޝައްފާ ލަތީފް (28އ)، އަހުމަދު މަދީހު (33އ)، އަހުމަދު އަނަމް އިބްރާހިމް (30އ) އަދި ނޫރުއްނިޒާމް (35އ) އެވެ. މި ހަތަރު މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން، މިހާރު ވަނީ 15 ދުވަހުގެ ބަންދުގެ މުއްދަތެއް ޖަހާފަ އެވެ.

މީގެއިތުރުން، ފުލުހުން ބުނީ، ހައްޔަރުކުރި މީހުންނަކީ މަސްތުވާތަކެތި އެތެރެކުރުމާއި މަނީ ލޯންޑަރިންގެ ނެޓްވޯކެއްގެ އިސްވެރިން ކަމަށެވެ. އަދި، މި ނެޓްވޯކުން 2015 ވަނަ އަހަރުން ފެށިގެން މަސްތުވާތަކެތީގެ ވިޔަފާރި ކުރަމުންދާ ކަން ތަހުގީގަށް ވަނީ އެނގިފަކަމަށާއި، މި ނެޓްވޯކަށް އަމާޒުކޮށް ހާއްސަ ތަހުގީގެއް ފަށާފައިވަނީ މިދިޔަ އަހަރުގެ މާޗު މަހު އެވެ. އަދި، ފާއިތުވި ފަސް އަހަރު ދުވަހުގެ ތެރޭގައި އެ ޖަމާއަތުން ވަނީ 300 މިލިއަން ރުފިޔާ އާއި 400،000 އެމެރިކާ ޑޮލަރު އެކި ބޭންކް އެކައުންޓްތަކަށް ޖަމާކޮށްފައިވާކަމަށްވެސް ފުލުހުން ބުންޏެވެ.

މި މައްސަލައިގެ ތަހުގީގަށް ކޯޓު އަމުރެއްގެ ދަށުން 13 މީހެއްގެ ނަމުގައި ހުރި 53 އެކައުންޓެއް މިހާރު ވަނީ ފްރީޒްކޮށްފަ އެވެ. ފުލުހުން އިތުރަށް ބުނީ، މި ނެޓުވޯކުގައި ހިމެނޭ 19 މީހަކު މިހާތަނަށް ދެނެގަނެވިފައިވާ ކަމަށާއި، މައްސަލައިގެ ތަހުގީގު ވަރަށް ފުޅާދާއިރާއެއްގައި ކުރިއަށްދާ ކަމަށެވެ.