ބޮޑުތަކުރުފާނު މަގުގެ ދެވަނަ ފިޔަވަހި ތަރައްގީކުރުމުގެ މަޝްރޫއުގެ މަސައްކަތްތައް ހަލުވިކަމާއެކު ކުރިއަށްދާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހާމަކޮށްފި އެވެ.

އެ ކުންފުނިން ބުނި ގޮތުގައި، މާލޭގެ ބޮޑުތަކުރުފާނު މަގު ފުޅާކޮށް ތަރައްގީކުރުމަށް ކުރިއަށްގެންދާ މި މަޝްރޫއުގެ ތެރެއިން، ޝީޓް ޕައިލް ކުރުމުގެ 48 މީޓަރުގެ މަސައްކަތް މިހާރު ވަނީ ނިންމާލާފަ އެވެ.

މީގެއިތުރުން، ބިން ހިއްކުމުގެ މަސައްކަތް ވެސް މެދުކެނޑުމެއްނެތި ކުރިއަށްދާއިރު، ހިނގާ މީހުންނަށް ހާއްސަ ސަރަހައްދުގައި ގާ އެތުރުމުގެ މަސައްކަތްވެސް މިހާރު ވަނީ ފަށާފަ އެވެ. އަދި ފެނާއި ނަރުދަމާގެ ނިޒާމު ގާއިމުކުރުމަށް ބޭނުންވާ ހޮޅި އެޅުމުގެ މަސައްކަތުގެ 50% މިހާތަނަށް ވަނީ ފުރިހަމަކޮށްފަ އެވެ.

ބޮޑުތަކުރުފާނު މަގުގެ ދެވަނަ ފިޔަވަހީގެ ދަށުން ތަރައްގީކުރަން ނިންމާފައި ވަނީ ލޯކަލް މާރުކޭޓުން ފެށިގެން ނޯތު ހާބަރާ ހަމައަށެވެ. މި ސަރަހައްދުގެ މަސައްކަތް އަންނަ އަހަރުގެ ރޯދަ މަހުގެ ކުރިން ނިންމުމަށް މަސަތްކަތްކުރަމުންދާކަމަށް ކަމަށް އެމްޓީސީސީން ވަނީ ބުނެފަ އެވެ.