ސޮމާލިއާގެ ދައުލަތާ ދެކޮޅަށް ބަގާވާތްކުރުމަށް ފަހު، އެ ގައުމުން ވަކިވެގަނެގެން އުޅޭ "ސޮމާލީލޭންޑް" އަކީ މިނިވަން ދައުލަތެއްގެ ގޮތުގައި ބަލައިގަތުމަށް އިޒްރޭލުން ނިންމި ނިންމުން ރާއްޖެއިން ކުށްވެރިކޮށްފި އެވެ.
ސައުދީ އަރަބިއްޔާގެ ޖިއްދާގައި ބޭއްވި އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ ހާރިޖީ ވަޒީރުންގެ ފެންވަރުގެ 22 ވަނަ އެކްސްޓްރާއޯޑިނަރީ ބައްދަލުވުމުގައި ވާހަކަދައްކަވަމުން، ދިވެހި ސަރުކާރުގެ ފަރާތުން މިކަން ކުށްވެރިކުރެއްވީ ފޮރިން މިނިސްޓަރު ޑރ. އަބްދުﷲ ހަލީލެވެ.
މި ބައްދަލުވުމަކީ ސޮމާލީލޭންޑަކީ ވަކި ދައުލަތެއްގެ ގޮތުގައި ބަލައިގަތުމަށް އިޒްރޭލުން ނިންމި ނިންމުމާ ގުޅޭގޮތުން މަޝްވަރާކުރުމަށް ހާއްސަކޮށްގެން ބޭއްވި ބައްދަލުވުމެކެވެ.
މި ބައްދަލުވުމުގައި ތަގުރީރު ކުރައްވަމުން މިނިސްޓަރު ވިދާޅުވީ، އިޒްރޭލުގެ މި ނިންމުމަކީ ސޮމާލިއާގެ މިނިވަންކަމާއި، ސިޔާދަތަށް އުނިކަންލިބޭ ފަދަ އަމަލެއް ކަމަށެވެ. އަދި މިއީ ބައިނަލްއަގްވާމީ އުސޫލުތަކާއި ހަމަތަކާ ކަނޑައެޅިގެން ހިލާފު، އަދި އދ. ގެ ޗާޓަރާވެސް ފުށުއަރާ ކަމެއްކަން މިނިސްޓަރު ފާހަގަކުރެއްވި އެވެ. މިނިސްޓަރުގެ ވާހަކަފުޅުގައި އިޒްރޭލުގެ މިފަދަ ނިންމުންތަކާމެދު ދިވެހި ސަރުކާރުން ނުހަނު ކަންބޮޑުވާކަން ހާމަކުރެއްވި އެވެ.
މީގެއިތުރުން، މެދުއިރުމަތީގެ މަސްރަހަށް އަލިއަޅުއްވާލައްވަމުން މިނިސްޓަރު ވިދާޅުވީ، ފަލަސްތީނުގެ ބިންތަކުގައި އިޒްރޭލުން ހިންގަމުންދާ އަނިޔާވެރި އަމަލުތައް އިންތިހާއަށް އިތުރުވެފައިވާ މި ދަނޑިވަޅުގައި، ބައިނަލްއަގުވާމީ ގާނޫނުތަކަށް އެ ގައުމުން އެއްވެސް އިހުތިރާމެއް ނުކުރާކަމީ މުޅި އިސްލާމީ އުންމަތުން ކަންބޮޑުވާންޖެހޭ ކަމެއް ކަމަށެވެ.
