ވެރިކަންކުރާ ޕީޕަލްސް ނޭޝަންލް ކޮންގްރެސް (ޕީއެންސީ)ގެ މައި ހަރުގެ ބޮޑުކޮށް، ޒަމާނީ ފެންވަރަށް ތަރައްގީކުރުމަށްފަހު މިރޭ ރަސްމީކޮށް ހުޅުވައިފި އެވެ.
ޕީއެންސީގެ މައި އޮފީސް ހުޅުވައިދެއްވީ އެކަމަށްޓަކައި ބޭއްވި ހާއްސަ ރަސްމިއްޔާތެއްގައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.
މީގެ ކުރިން އެމްޑީޕީ އާއި ދަ ޑިމޮކްރެޓްސްއިން ބޭނުންކުރި މި އިމާރާތް ޕީއެންސީގެ ހަރުގެއެއްގެ ގޮތުގައި ބޭނުންކުރަން ފަށާފައިވަނީ ޖުލައި 2024ގަ އެވެ. މި ތަން އިތުރަށް ތަރައްގީކޮށް، މިހާރު ވަނީ ހަތަރު ފަންގިފިލާގެ އޮފީސް އިމާރާތަކަށް ބަދަލުކޮށްފަ އެވެ.
މި ރަސްމިއްޔާތުގައި ޕާޓީީގެ އޮފީހާ ގުޅޭގޮތުން ވާހަކަދައްކަވަމުން ޕީއެންސީގެ ޕްރައިމެރީ ލީޑަރު ފަލާހް ވިދާޅުވީ، އަލަށް ހުޅުވި ހަރުގޭގައިި ޕާޓީގެ ޖަގަހަގެ އިތުރުން އޮފީސް ވެސް ހުންނާނެ ކަމަށެވެ. ހަރުގެ މިހާރު ވަނީ، ބޮޑުކޮށް ހަތަރު ފަންގިފިލާއަށް އުސްކޮށްފަ އެވެ. އަދި އެ ތަން ބޮޑުކުރުމަށް ޓަކައި އެ ސަރަހައްދުގައި މީގެ ކުރިން ހުރި ތޫމް ކެފޭ ވެސް ވަނީ ބަދަލުކޮށް، އާޓިފިޝަލް ބީޗު ކުރިމައްޗަށްވާހެން ޖަގަހައިގެ ފާރުގައި ބޮޑު އެލްއީޑީ ސްކްރީނެއް ވެސް ވަނީ ހަރުކޮށްފަ އެވެ.
