ދުންފަތުގެ އިސްތިއުމާލު ނުކުރުން ފާހަގަކުރުމަށް ބައިނަލްއަގްވާމީ ގޮތުން ފާހަގަކުރާ ދުވަހާ ގުޅުވައިގެން ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) އިން ދޭ "ވޯލްޑް ޓޮބޭކޯ ޑޭ އެވޯޑް" އަށް ކުރިމަތިލުމުގެ ފުރުސަތު ހުޅުވާލައިފި އެވެ.
މި އެވޯޑަކީ ދުންފަތް ކޮންޓްރޯލް ކުރުމުގެ ދާއިރާގައި ފާހަގަކޮށްލެވޭ މަސައްކަތްތަކެއް ކުރާ ފަރާތްތަކުގެ އަގުވަޒަންކޮށް، އެ މަސައްކަތުގައި އިތުރު ހިތްވަރެއް ދިނުމުގެ މަގްސަދުގައި ކޮންމެ އަހަރަކުވެސް ދެމުން އަންނަ އެވޯޑެކެވެ. އެޗްޕީއޭ އިން މިއަދު ބުނެފައިވަނީ ދުންފަތުގެ ނުރައްކަލުން މުޖުތަމައު ސަލާމަތް ކުރުމަށް މަސައްކަތް ކުރާ ފަރުދުންނާއި، ޖަމާއަތްތަކުގެ އިތުރުން ސަރުކާރުގެ އިދާރާތަކަށްވެސް މި އެވޯޑަށް ކުރިމަތިލުމުގެ ފުރުސަތު ހުޅުވާލާފައިވާ ކަމަށެވެ.
އެޗްޕީއޭއިން ބުނިގޮތުގައި އެ އެވޯޑު ދޭއިރު މިއަހަރުގެ ދުނިޔޭގެ ދުންފަތުގެ އިސްތިއުމާލު ނުކުރާ ދުވަހުގެ ޝިއާރާ ގުޅުންހުރި މަސައްކަތްތައް ކުރާ ފަރާތްތަކަށް އިސްކަންދެވޭނެ އެވެ. މިއަހަރުގެ ޝިއާރަކީ "އަންމާސްކިން ދަ އެޕީލް – ކައުންޓަރިން ނިކޮޓިން އެންޑް ޓޮބޭކޯ އެޑިކްޝަން" އެވެ.
މި އެވޯޑަށް ނަން ހުށަހެޅުމުގެ ސުންގަޑިއަކީ މި މަހުގެ 16 ވާ ހުކުރު ދުވަހެވެ. ކުރިމަތިލުމަށް ބޭނުންވާ ފަރާތްތަކުން ޑަބްލިއުއެޗްއޯގެ ރަސްމީ ލިންކު މެދުވެރިކޮށް ހުށަހެޅުންތައް ފޮނުވޭނެ އެވެ. ދުނިޔޭގެ ދުންފަތުގެ އިސްތިއުމާލު ނުކުރާ ދުވަހުގެ ގޮތުގައި ކޮންމެ އަހަރަކުވެސް ބައިނަލްއަގްވާމީ ފެންވަރުގައި ފާހަގަކުރަނީ މެއި މަހުގެ 31 ވަނަ ދުވަހެވެ.
