ހާއްސަ ސިއްހީ ބޭނުންތަކަށް ޗުއްޓީއަށް އެދޭއިރު، ސަރުކާރު މުވައްޒަފުން ސީދާ ސިވިލް ސާވިސް ކޮމިޝަންއަށް އެކަމަށް އެދި ހުށަހަޅަންޖެހޭ ގޮތަށް ބަދަލުކޮށްފި އެވެ.
ސިވިލް ސާވިސް ގަވާއިދުގެ ދަށުން ލިބިދެވޭ 'ހާއްސަ ސިއްހީ ބޭނުންތަކަށްދެވޭ ޗުއްޓީ’އަށް މުވައްޒަފުން އެދޭ ހާލަތުގައި، މީގެކުރިން އޮންނަ ގޮތަކީ އެ މުއައްޒަފެއް މަސަތްކަތްކުރާ އޮފީސް މެދުވެރިކޮށް ސިިވިލް ސާވިސްއަށް ހުށަހަޅާގޮތަށެވެ.
ސިވިލް ސާވިސްއިން ބުނި ގޮތުގައި، މިގޮތަށް ބަދަލު ގެންނަން ނިންމީ، ޗުއްޓީދިނުމާ މެދު ގޮތެއް ކަނޑައަޅައި، މުވައްޒަފުންނަށް އެންގުމަށް ގިނަ ދުވަސްތަކެއް ހޭދަވަމުންދާތީ މި ކަމަށް ހައްލެއް ހޯދުމުގެ ގޮތުންނެވެ. އެހެންކަމުން ސިވިލް ސާވިސްއިން ވަނީ، އެ މުވައްޒަފެއް މަސައްކަތްކުރާ އިދާރާއަށް ކޮޕީކުރުމަށް ފަހު، ޗުއްޓީ ހަމަޖައްސައިދިނުމަށް އެދި، އެ މުވައްޒަފެއް ސިވިލް ސަރވިސް ކޮމިޝަނަށް ހުށަހެޅުމަށް އެދިފަ އެވެ.
އެގޮތުން، މުވައްޒަފުން ޗުއްޓީއަށް އެދި ހުށަހަޅާ އިރު، ޗުއްޓީ ފަށަން ބޭނުންވާ ތާރީހުގެ ފަނަރަ ދުވަސްކުރިން ކަމާގުޅުންހުރި ލިޔެކިޔުންތަކާއެކު "ހާއްސަ ސިއްހީ ބޭނުންތަކަށްދެވޭ ޗުއްޓީއަށް އެދޭ ފޯމު" މެދުވެރިކޮށް އެ ކޮމިޝަނަށް ހުށަހެޅުމަށް ވަނީ އެދިފަ އެވެ.
