މޯލްޑިވޮސް ޒަކާތު ހައުސް ބެލެހެއްޓުން މަރުކަޒީ ބޭންކް މޯލްޑިވްސް މޮނެޓަރީ އޮތޯރިޓީ (އެމްއެމްއޭ) އާ ހަވާލުކުރުމަށް މިއަދު އެއްބަސްވުމެއްގަ ސޮއިކޮށްފި އެވެ.
މި އެއްބަސްވުމުގައި އިސްލާމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. ޝަހީމް އަލީ ސައީދެވެ. އެމްއެމްއޭގެ ފަރާތުން ސޮއިކުރެއްވީ ގަވަރުނަރު އަހުމަދު މުނައްވަރެވެ.
މި އެއްބަސްވުމުގެ ދަށުން، ޒަކާތު ފަންޑު ބަލަހައްޓާނީ، ޕަބްލިކް ބޭންކް އެކައުންޓާ ވަކި އެކައުންޓެއްގަ އެވެ. އަދި ހާމަކަން ބޮޑު ގޮތެއްގައި ދެފުށް ފެންނަ ގޮތަށް ޒަކާތުގެ ފައިސާ ބަހާނެ ކަމަށް ބުނެފަ އެވެ.
މީގެއިތުރުން މި އެއްބަސްވުމުގެ ދަށުން، ޒަކާތު ފަންޑު މެދުވެރިކޮށް އިސްލާމީ ޝަރީއާ ހުއްދަކުރާ ގޮތުގެ މަތިން އިންވެސްޓްކޮށް، ފައިދާވެސް ހޯދޭނެ ގޮތްވެސް މަގުފަހި ވާނެ އެވެ. މި އެއްބަސްވުމުގެ މަސައްކަތްތައް ކުރިއަށް ގެންދާނީ، އިސްލާމިކް ސޯޝަލް ފައިނޭންސް އިންސްޓްރޫމެންޓްތަކުގެ އިންސްޓިޓިއުޝަނަލް ފްރޭމްވޯކްތަކާއި، ގަވަނަންސް ސްޓްރަކްޗާތައް ހަރުދަނާކުރާ މޯލްޑިވްސް އިސްލާމިކް ސޯޝަލް ފައިނޭންސް އިނިޝިއޭޓިވްގެ ދަށުންނެވެ.
