މޯލްޑިވްސް އެއަޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ކުރިއަށްގެންދާ ބިން ހިއްކުމުގެ ތިން މަޝްރޫއު، ކަނޑައެޅިފައިވާ ތާރީހަށް ނިންމާނެ ކަމުގެ ޔަގީންކަން އެ ކުންފުނީގެ ސީއީއޯ އަދި މެނޭޖިން ޑިރެކްޓަރު އިބްރާހީމް ޝަރީފް މުހައްމަދު ދެއްވައިފި އެވެ.
ޝަރީފް މިފަދައިން ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް، ހއ. ދިއްދޫ އެއަރޕޯޓް ތަރައްގީކުރުމަށާއި ބޯހިޔާވަހިކަމުގެ އިތުރުން އެކި ބޭނުންތަކަށް ބޭނުންވާ ބިން ހިއްކުމުގެ މަޝްރޫއު ފެށުމަށް މިއަދު ދިއްދޫގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ވާހަކަފުޅު ދައްކަވަމުން ޝަރީފް ވިދާޅުވީ، މި މަޝްރޫއު ފެށުމަކީ ދިއްދޫގެ ރައްޔިތުން ދެކެމުން އައި ދިގު އިންތިޒާރަކަށް ނިމުން އައި އުފާވެރި ދުވަހެއް ކަމަށެވެ. އަދި އެމްއޭސީއެލްއަށް އިތުބާރު ކުރައްވައި މި ބޮޑު މަޝްރޫއު ހަވާލުކުރެއްވި ކަމަށްޓަކައި ރައީސުލްޖުމްހޫރިއްޔާއަށް ކުންފުނީގެ ނަމުގައި އޭނާ ޝުކުރު އަދާކުރެއްވި އެވެ.
މީގެއިތުރުން، މި މަޝްރޫއު ހަވާލުކުރެއްވުމަށްފަހު، ވީ އެންމެ އަވަސް މުއްދަތެއްގެ ތެރޭގައި މަސައްކަތް ނިންމުމަށް ރައީސުލްޖުމްހޫރިއްޔާ އިރުޝާދު ދެއްވާފައިވާކަން ވެސް ޝަރީފް ފާހަގަކުރެއްވި އެވެ. އެގޮތުން، ރައީސްގެ އިރުޝާދުފުޅާއެކު ދިއްދޫ ބިން ހިއްކުމުގެ މަޝްރޫއު އަވަސްކުރުމަށް ގެނެސްފައިވާ "ލީވް އެރިކްސަން" އަކީ ދުނިޔޭގެ އެންމެ ބޮޑު ޑްރެޖަރުކަން ފާހަގަކުރައްވާ، ދިއްދޫ ބިން ހިއްކައި އެއާޕޯޓް އެޅުމުގެ މަޝްރޫއު އާއެކު ރަށުގެ އިގުތިސާދު ތަންމިނަށް ހުޅުވިގެންދާނެ ކަމަށް އޭނާ ވިދާޅުވި އެވެ.
