ޖުވާ ކުޅުމަކީ ޖިނާއީ ކުށެއްގެ ގޮތުގައި ކަނޑައަޅައި، އެއް އަހަރަށް ވުރެ ދިގު ޖަލު ހުކުމެއް އަންނަ ގޮތަށް ގާނޫނުލް އުގޫބާތަށް އިސްލާހު ހުށަހަޅައިފި އެވެ.
ސަރުކާރުގެ ފަރާތުން ހިތަދޫ މެދު ދާއިރާގެ މެމްބަރު އަޒާން މަރުޒޫގް ހުށަހެޅުއްވި މި ބިލުގެ މަގްސަދަކީ ޖުވާކުޅުމާއި ޖުވާކުޅޭ ތަނެއް ހިންގުމަކީ ޖިނާއީ ކުށެއްގެ ގޮތުގައި ކަނޑައަޅައި ބައެއް ކުށްތަކުގެ އުންސުރުތަކުގެ ދަރަޖަތައް ބަދަލުކުރުމެވެ.
މި ބިލުގައި ޖުވާކުޅުމާއި ޖުވާ ކުޅޭ ތަންތަން ހިންގުމަކީ ޖިނާއަތުގެ 4 ވަނަ ދަރަޖައިގެ ކުށެކެވެ. އެފަދަ ކުށްތަކުގެ އަދަބަކީ، އަސާސީ މިންގަނޑުން ބަލާނަމަ، އެއް އަހަރާއި ހަތް މަސް އަދި ހަ ދުވަހުގެ ޖަލު ހުކުމެކެވެ. އެންމެ ބޮޑުކޮށް ހަތަރު އަހަރާ ހަމަޔަށް ޖަލަ ލެވޭނެ އެވެ. ކުޑަ އަދަބަކީ 24 ދުވަހުގެ ޖަލު ހުކުމެކެވެ.
މި ބިލުގައި ޖުވާކުޅުން މާނަކޮށްފައިވަނީ:
- ވަކި މުބާރާތެއްގައި ނުވަތަ ކުޅިވަރެއްގައި ނުވަތަ ސްކީމެއްގައި އިލެކްޓްރޯނިކްކޮށް ނުވަތަ ޖުވާކުޅުމުގެ އާލާތެއް މެދުވެރިކޮށް ހިންގަމުންދާ ވަކި ކަމެއްގެ މައްޗަށް ބިނާކޮށް އެކަމަކުން ނުކުންނާނެ ނަތީޖާއެއް ލިބިގަތުމުގެ މުގާބިލުގައި މީހަކު އަގެއް ހުރި އެއްޗެއް ދޫކޮށްލުން
- ޖުވާކުރުން ކަމަށް ނުލެބެވޭނެ ކަންކަމުގެ ތެރޭގައި ބިލުގައި ހިމަނާފައިވަނީ މުނިފޫހިފިލުވުމުގެ ނުވަތަ ކުޅިވަރުގެ ބޭނުމަށްޓަކައި އެކި ފަރާތްތަކުން އިންތިޒާމްކޮށްގެން ބާއްވާ މުބާރާތްތަކުގައި ބައިވެރިވުމާއި، އެފަދަ މުބާރާތްތަކުގައި ހިމެނޭ ބައިވެރިންނަށް، ފައިސާގެ ނުވަތަ އެނޫންވެސް އަގެއް ހުރި އެއްޗެއް އެކުލެވޭ އިނާމެއް ދިނުން
- އެއްވެސް އަގެއް ދިނުމަކާ ނުލައޮ މީހުންގެ މެދުގައި ގުރުއަތުލައިގެން ހޮވޭ ފަރާތްތަކަށް ނުވަތަ ފަރާތްތަކަށް ފައިސާގެ ނުވަތަ އެ ނޫންވެސް އަހެއް ހުރި އެއްޗެއް އެކުލެވޭ އިނާމެއް ދިނުމާއި، އެކަމަށްޓަކައި ބޭއްވޭ ގުރުއަތުލުންތަކުގައި ބައިވެރިވުން
- ޖުވާކުޅުމުގެ އާލާތެއް ކަމުގައި ނުވާ އިލެކްޓްރިކް ނުވަތަ އިލެކްޓްރޯ މެކޭނިކަލް ނުވަތަ މެކޭނިކަލް ގޮތަކުން ކުޅިވަރުގެ ބޭނުމަށް ފަރުމާކުރެވިފައިވާ ނުވަތަ އެޑެޕްޓްކުރެވިފައިވާ ޑިވައިސް ނުވަތަ މެޝިނަކުން ކުޅުންތެރިންނަށް ލިބިދޭ ވަނަތަކާއި، އިނާމާއި، އެފަދަ އެއްޗެއް ރިޑީމްކުރުމަށް ދާ އަގެއް ރަމްޒުކޮށްދޭ ކޮއިން ނުވަތަ ޓޯކަލް ފަދަ ތަކެތި ލިބިގަތުމާއި އެފަދަ ޑީވައިސް ނުވަތަ މެޝިން ބޭނުންކުރުން
ޖުވާކުޅޭ އާލާތްތަކުގެ ގޮތުގައި މާނަކޮށްފައިވަނީ އެ އެއްޗެއް އޮޕަރޭޓްކޮށްގެން އެ މީހެއްގެ ނަސީބަށް ނުވަތަ ހުނަރަށް ބިނާކޮށް އެމީހަކަށް ފައިސާ ނުވަތަ އަގެއް ހުރި އެއްޗެއް ލިބުން ނުވަތަ ލިބުމުގެ ހައްގެއް ނުވަތަ މަސްލަހަތެއް ލިބޭ ގޮތް މަގުފަހިވުމަށެވެ.
