ޕެންޝަން ސްކީމް މެދުވެރިކޮށް ގެދޮރުވެރިކަމަށް ޕެންޝަން ފައިސާ ބޭނުންކުރެވޭ ގޮތް ހަަދަން ޕެންޝަނާ ބެހޭ ގާނޫނަށް އިސްލާހު ހުށައަޅައިފި އެވެ.
ސަރުކާރުގެ ފަރާތުން ރައްޔިތުންގެ މަޖިލީހަށް މި ބިލު ހުށަހެއްޅުވީ މިލަންދޫ ދާއިރާގެ މެންބަރު ހަސަން މުފީދު އަބްދުލް ގާދިރެވެ. ޕެންޝަނާ ބެހޭ ބިލަށް ހުށައަޅާފައިވާ އިސްލާޙުގައި ވާގޮތުން ގެދޮރު ގަންނަން ނުވަތަ ގެދޮރު އިމާރާތްކުރަން ޕެންޝަން ފަންޑުން ފައިސާ ކޮލެޓަރަލްގެ ގޮތުގައި ބޭނުންކުރެވޭނެ އެވެ. ނަމަވެސް މި ގޮތަށް ކަން ކުރެވޭނީ، ގެދޮރު ގަންނަނީ ނުވަތަ އިމާރާތް ކުރަނީ ހަމައެކަނި ބޭންކަކުން ނަމަ އެ ބޭންކަކުން ދޫކުރާ ލޯނަކަށެވެ.
މީގެއިތުރުން، ގެދޮރުގެ ތަރައްގީއަށް ފައިނޭންސްކުރާ ކުންފުންޏެއް ނުވަތަ އެފަދަ މާލީ މުއައްސަސާއަކުން ދޫކުރާ ލޯންތަކަށްވެސް ޕެންޝަން ފައިސާ ކޮލެޓަލަރައިޒް ކުރެވޭނެ އެވެ. މި އިސްލާހުގައި ވާގުތުން ލޯނު ނަގާ ފަރާތުގެ ފައިސާ ދެއްކުމުގެ ގާބިލުކަން ހުރި މިންވަރު ބަލާނެ މިންގަނޑެއްވެސް ޕެންޝަން ބޯޑުން ކަނޑައަޅާނެ އެވެ. އަދި ޕެންޝަން ބޯޑު މެދުވެރިކޮށް ފައިސާ ކޮލެޓަލަރައިޒް ކޮށްފައިވާ ފަރާތްތަށް ރިޓަޔާކުރުމާ ބެހޭ އުސޫލާއި އެހެނިހެން އުސޫލުތަށް ވެސް ކަނޑައަޅާނެ އެވެ.މި ބިލުގައި ބުނެފައިވަނީ، ރައްޔިތުންނަށް ގެދޮރު ގަންނަން ނުވަތަ އިމާރާތް ކުރުމަށް ޕެންޝަން ފައިސާ ރަހުނުގެ ގޮތުގައި ބޭނުން ކުރެވޭނެ ކަމަށެވެ.
މިހާރު ގާނޫނު އޮންނަ ގޮތުން ޕެންޝަން ސްކީމް މެދުވެރިކޮށް ގެދޮރު ގަންނަން ނުވަތަ އިމާރާތްކުރުމަށް ފައިސާ ބޭނުމެއް ނުކުރެވެ އެވެ.
މި ބިލުގައި ވަނީ ހައްޖަށް ދިޔުމަށް ދައްކަންޖެހޭ ފައިސާގެ ތެރެއިން 80% ފައިސާ ރިޓަޔަމަންޓް ސޭވިންގްސް އެކައުންޓުން ދެއްކޭނެ ގޮތަށް ކަނޑައެޅުމަށް ހުށަހަޅާފަ އެވެ. އެގޮތުން، ހައްޖަށް ފައިސާ ބޭނުންކުރާނަމަ، ހައްޖުގެ އަޅުކަން އަދާކޮށްފައިނުވާ ފަރާތްތަކަށާއި، ޕެންޝަން ލިބޭ އުމުރު ހަމަވާއިރު މަހަކު 2000 ރުފިޔާ މޯލްޑިވްސް ރިޓަޔަމެންޓް ޕެންޝަން ސްކީމުން ދެވޭ މިންވަރަށް އެމީހެއްގެ ރިޓަޔަމެންޓް ސޭވިންގްސް އެކައުންޓުގައި ޖަމާވެފައި ހުރި ފަރާތަކަށް ވާންޖެހޭނެ އެވެ. ރިޓަޔަމެންޓް ސޭވިންގްސް އެކައުންޓުން ހައްޖަށް ދައްކަން ޖެހޭ ފައިސާގެ 80% ދެއްކުމުން، ރާއްޖެއިން ހައްޖަށް މީހުންގެންދިޔުމަށް ކަނޑައާޅާފައިވާ ކިޔުގެ ތަރުތީބުން އެމީހަކަށްވެސް ޖާގަ ރިޒާވްކޮށް ކިޔުއަށް އެރޭނެ އެވެ. މިގޮތަށް ކަން ކުރެވޭނީ ވެސް ވަކި ޝަރުތުތަކެއް ހަމަވެގެންނެވެ.
މީގެއިތުރުން 'ޓާމިނަލް އިލްނަސް’އެއް ތަހައްމަލް ކުރަމުން ދާ ފަރާތްތަކަށް ރިޓަޔަމަންޓު ސޭވިންގްސް އެކައުންޓުގައި ހުރި ފައިސާ ބޭނުންކުރުމުގެ ފުރުސަތު ފަހިކުރުމަށް ވެސް ވަނީ އިސްލާހު ހުށަހަޅާފަ އެެވެ. .އެގޮތުން ޓާމިނަލް އިލްނަސްގެ ހާލަތުގައިވާ މީހަކު އޭނާގެ ޕެންޝަން ފައިސާ ދޫކޮށްދޭން އެދިއްޖެ ނަމަ، އެކައުންޓުގައި ހުރި ހުރިހާ ފައިސާއެއް ނުވަތަ އެ މީހަކު އެދޭ މިންވަރަކަށް ފައިސާ ދޫކުރާނެ އެވެ. 12 މަހަށް ވުރެ ދިގު މުއްދަތަކަށް އެ މީހަކު ދިރިހުރުމަކީ ނާދިރުކަމެއް ކަމަށް ސްޕެޝަލިސްޓު ޑޮކްޓަރަކު ކަނޑައަޅައިފިނަމަ، ބަލިމީހާގެ ރިޓަޔަމަންޓު ސޭވިންގްސް އެކައުންޓުގައި ހުރި ފައިސާއެއް ބޭނުންކުރުމުގެ ފުރުސަތު ލިބޭނެ އެވެ.
