ހުޅުމާލޭގެ ފޭސް 3ގެ ބިން ހިއްކުމުގެ މަޝްރޫއުގައި މިހާތަނަށް 49 ހެކްޓަރުގެ ބިން ހިއްކައިިފި އެވެ.
އެމްއޭސީއެލުން ބުނި ގޮތުގައި ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ) އާ ހަވާލުކޮށްގެން ކުރިއަށް ގެންދާ މި މަޝްރޫއުގެ ދަށުން ޖުމްލަ 63 ހެކްޓަރުގެ ބިން ހިއްކުމަށް ސަރުކާރުން ނިންމަވާފައިވާއިރު، މިހާތަނަށް 49 ހެކްޓަރުގެ ބިން ވަނީ ހިއްކާ ނިންމާފަ އެވެ.
މި މަޝްރޫއުގެ މަސައްކަތް ވަގުތީ ގޮތުން ހުއްޓުމަކަށް އައުމަށްފަހު އަލުން ފަށާފައިވަނީ މިދިޔަ ނޮވެމްބަރު މަހުގެ 10 ވަނަ ދުވަހު އެވެ. މި މަޝްރޫއުގެ މަސަތްކަތް އަވަސްކުރުމުގެ ގޮތުން، މިދިޔަ މަހުގެ 26 ވަނަ ދުވަހު ސަރުކާރުން ވަނީ ބޮސްކާލިސްގެ ޓްރެއިލިން ސަކްޝަން ހޮޕާ ޑްރެޖަރެއް ރާއްޖެ ގެނެސް، ބިން ހިއްކުމަށް ބޭނުންކުރަން ފަށާފަ އެވެ.
ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވި ގޮތުގައި ހުޅުމާލެ ފޭސް 3 ހިއްކުމުގެ މަސައްކަތް އަންނަ މަހުގެ 20 ގައި ނިންމާލެވޭނެ އެވެ.
ހުޅުމާލެ ތިންވަނަ ފިޔަވަހީގެ ބިން ހިއްކުމުގެ މަސައްކަތް ކުރިއަށް އޮތް ދޮޅު މަސްދުވަހުގެ ތެރޭގައި ނިންމުމަށް ދަނީ މަސައްކަތް ކުރަމުންނެވެ. އެގޮތުން މިހާރު މަސައްކަތުގެ ސްޕީޑުވެސް ވަނީ އަވަސްކޮށްފަ އެވެ. ސަރުކާރުން ހުޅުމާލެ ތިންވަނަ ފިޔަވަހި ހިއްކުމުގެ މަސައްކަތް ހަވާލުކޮށްފައިވަނީ، ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން، ސީއެމްސީއާ އެވެ.
