ރާއްޖޭގެ ސިޔާސަތުތައް ބިނާވެފައި ވަނީ އޯގާތެރިކަމުގެ މައްޗަށް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވީ، ދުނިޔޭގެ ބްރެއިލް ދުވަހުގެ މުނާސަބަތުގައި މިއަދު "އެކްސް"ގައި ކުރެއްވި ޕޯސްޓެއްގަ އެވެ. ރައީސް ވިދާޅުވީ، ސަރުކާރުގެ އަމާޒަކީ އެއްވެސް މީހަކު ބާކީނުކޮށް، ކޮންމެ ފަރުދަކަށް ވެސް ފަސޭހަކަމާއެކު ކަންކަމުގައި ބައިވެރިވެވޭނެ ފަދަ މާހައުލެއް ރާއްޖޭގައި ގާއިމު ކުރުން ކަމަށެވެ.

މީގެއިތުރުން، ފެނުމުގެ ނުކުޅެދުންތެރިކަން ހުންނަ ފަރާތްތަކަށް އުނގެނުމުގެ ފުރުސަތުތައް ފަހިކޮށްދީ، އެ ފަރާތްތަކަކީ އަމިއްލަ ފައިމައްޗަށް ތެދުވެފައިވާ ބަޔަކަށް ހެދުމަށާއި، އިންސާނީ ކަރާމާތް ހޯދައިދިނުމުގައި ބްރެއިލް އަދާކުރަނީ ވަރަށް މުހިންމު ރޯލެއްކަމަށްވެސް ރައީސް ވިދާޅުވި އެވެ. ހަގީގީ މާނައިގައި އެންމެން ބައިވެރިކުރާ މުޖުތަމައެއްގެ ސިފަތަކަށް އަލިއަޅުއްވާލައްވަމުން ރައީސް ވިދާޅުވީ، އެއީ އެއްވެސް ހުރަހެއް ނެތި މައުލޫމާތާއި ފުރުސަތުތަކުގެ ބޭނުން ހަމަހަމަކަމާއެކު ހިފޭނެ މަގު ތަނަވަސްވެފައިވާ މުޖުތަމައެއް ކަމަށެވެ.

ބައިނަލްއަގުވާމީ ގޮތުން ބްރެއިލް ދުވަސް ފާހަގަކުރަން ފެށީ، ފެނުމުގެ ނުކުޅެދުންތެރިކަން ހުންނަ ފަރާތްތައް ބާރުވެރި ކުރުވުމުގައި ބްރެއިލްގެ ބާރާ ގުޅޭގޮތުން އާންމުން ހޭލުންތެރި ކުރުމަށް، ބްރެއިލްގެ ބާނީ ލުއީސް ބްރެއިލްގެ އުފަންދުވަހާ ގުޅުވައިގެންނެވެ. ކޮންމެ އަހަރެއްގެ ޖެނުއަރީ މަހުގެ 4 ވަނަ ދުވަސް ދުނިޔޭގެ ބްރެއިލް ދުވަހުގެ ގޮތުގައި ފާހަގަކުރެ އެވެ.