ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ހައްޔަރުކޮށްފައިވާ "ދަ ޓްރެވެލް ގައިސް ޕްރައިވެޓް ލިމިޓެޑް" ގެ އިސްވެރިޔާ ހުސައިން ސަނީ އުމަރު، ޝަރީއަތް ނިމެންދެން ބަންދުގައި ބެހެއްޓުމަށް ކްރިމިނަލް ކޯޓުން އަމުރުކޮށްފި އެވެ.

ފުލުހުން ބުނި ގޮތުގައި، ސަނީ އުމަރުގެ މައްޗަށް ކުރެވޭ ތުހުމަތުތަކާ ގުޅިގެން އޭނާގެ ބަންދާމެދު ގޮތެއް ނިންމުމަށް މިއަދު ކޯޓަށް ހާޒިރުކުރުމުން، މައްސަލައިގެ ޝަރީއަތް ނިމެންދެން ބަންދުގައި ބެހެއްޓުމަށް ވަނީ ނިންމާފަ އެވެ. އޭނާ މިއަދު ކޯޓަށް ހާޒިރުކުރީ، މީގެ ކުރިން ބަންދަށް ދީފައިވާ 30 ދުވަހުގެ މުއްދަތު ހަމަވުމާ ގުޅިގެންނެވެ.

ހަލާލް ޓޫރިޒަމް ބްރޭންޑްގެ ދަށުން ހިންގާ ޓްރެވެލް އެޖެންސީއަކާއި މީޑިއާ ޕީއާރު ފާމެއްގައި އިސްކޮށް މަސައްކަތްކުރާ ސަނީ އުމަރުގެ މައްޗަށް ތުހުމަތު ކުރެވުނީ، އޭނާގެ ފަރާތުން ޖިންސީ ގޯނާ ލިބުނު ކަމަށް ބުނާ ކުއްޖެއްގެ އާއިލާއިން ފުލުހަށް މައްސަލަ ހުށަހެޅުމާ ގުޅިގެންނެވެ. މި މައްސަލަ ފެންމަތިވީއިރު ސަނީ އުމަރު ހުރީ ރާއްޖެއިން ބޭރުގަ އެވެ. އޭނާ ރާއްޖެ އެނބުރި އައުމާއެކު ވެލާނާ އިންޓަނޭޝަނަލް އެއާޕޯޓުން ފުލުހުންގެ ބެލުމުގެ ދަށަށް ގެންގޮސް ވަނީ ސުވާލުކޮށްފަ އެވެ.

އޭރު ސުވާލު ކުރުމަށްފަހު ދޫކޮށްލުމާ އެކު އޭނާ އަނެއްކާވެސް ފުރަން ގޮސް ހުއްޓާ ވެލާނާ އެއާޕޯޓުން ފުލުހުން ހުއްޓުވައި ހައްޔަރުކުރީ މިދިޔަ ޑިސެމްބަރު މަހުގެ 4 ގަ އެވެ.