2026 ވަނަ އަހަރު ރާއްޖެއަށް ޒިޔާރަތްކުރި ފުރަތަމަ ފަތުރުވެރިޔާއަށް ހޫނު މަރުހަބާއެއް ކިޔައިފި އެވެ.
މި އަހަރުގެ ފުރަތަމަ ފަތުރުވެރިޔާގެ ޝަރަފު ހޯދާފައިވަނީ އެތިހާދު އެއާވޭސްގެ ފްލައިޓަކުން ރާއްޖެ އައި ޖަރުމަނުގެ ރައްޔިތެއް ކަމަށްވާ ތޯމަސް އެންޑްރޫ ހެލްވެގާ އެވެ. އޭނާ ރާއްޖެ އައިސްފައި ވަނީ އޭނާގެ އަންހެނުންނާއެކު އެވެ. މިއީ ތޯމަސް އާއި އޭނާގެ އަންހެނުން ރާއްޖެ އައި ފުރަތަމަ ފަހަރެވެ.
ތޯމަސްއަށް މަރުހަބާ ކިޔުމުގެ ގޮތުން ވެލާނާ އިންޓަނޭޝަނަލް އެއާޕޯޓުގެ އެރައިވަލް ހޯލުގައި ވަނީ ހާއްސަ ރަސްމިއްޔާތެއް ބާއްވާފަ އެވެ. މި ރަސްމިއްޔާތުގައި އެމްއޭސީއެލްގެ ފަރާތުން އޭނާއަށް މަރުހަބާ ވިދާޅުވީ ޕެސެންޖާ ސާވިސަސްގެ ޑެޕިއުޓީ ޗީފް އޮފިސަރު އަލީ މުސްތާގެވެ.
މީގެއިތުރުން މި ހަފުލާގެ ތެރެއިން އެމްއޭސީއެލްގެ ފަރާތުން ވަނީ ތޯމަސްއަށް ހާއްސަ ހަނދާނީ ހަދިޔާއެއް ވެސް ދެއްވާފަ އެވެ.
