އިސްތަށިގަނޑުގައި ކަޅުކުލަ ފިޔަވައި އެހެން ކުލައެއް ޖެއްސުމާއި، ޝޭޑްކުރުން ވެސް މަނާކޮށް ސިވިލް ސާވިސް މުވައްޒަފުންގެ ހެދުން އަޅާ މިންގަނޑު ހަރުކަށިކޮށްފި އެވެ.

ދިވެހި ސިވިލް ސާވިސްގެ ގަވާއިދަށް އިއްޔެ ގެނައި އިސްލާހުގައި ވަނީ ފިރިހެން މުވައްޒަފުންނާއި އަންހެން މުވައްޒަފުން ހެދުން އަޅާ މިންގަނޑަށް ބަދަލުތަކެއް ގެނެސްފަ އެވެ. އެގޮތުން އިސްތަށިގަނޑުގައި ކަޅު ކުލަ ފިޔަވައި އެހެން ކުލައެއް ޖެއްސުމާއި ޝޭޑުކުރުން ވެސް ވަނީ އެ ބަދަލުތަކުގެ ތެރޭގައި ހިމަނާފަ އެވެ.

އިސްލާހުގައި ބުނަނީ އަންހެން މުވައްޒަފުންގެ ހެދުމުގެ ގޮތުގައި ދިގު ހެދުން ނުވަތަ ދިވެހި ލިބާސް ބޭނުންކުރެވޭނެ ކަމަށާއި އެ ހެދުން ހުންނަންޖެހޭނީ އުސޫލުގައި ބުނާގޮތުން ފައިގެ ތަނބިކަށްޓަށް ވުރެ ކުރުނުވާ ގޮތަށް ކަމަށެވެ.

ޖެކެޓާ އެކު ލާ ފަޓުލޫނު ނުވަތަ ހަރުވާޅު ހުންނަން ތައްޔާރުކޮށްފައިހުންނަން ޖެހޭނީ އިސްލާހުގައި ބުނާގޮތުން އޮފީހުގެ މާހައުލާ ގުޅޭ ފޮއްޗަކުން ނެވެ.

ކޮންމެ ހެދުމެއްގެ ވެސް ކަރު، މުޖުތަމައުގެ އަދަބާ ހިލާފުނުވާނެ ގޮތަށް ކަރުވަޅު ނިވާވާން ޖެހޭނެ ކަމަށް ވެސް ވެ އެވެ. އަދި އެ މީހެއްގެ ކޮނޑުހުޅާއި އުޅަބޮށްޓާ ދެމެދަށް ވުރެ ކުރުނުވާ ވަރަށް ހުންނަން ޖެހޭއިރު އަތް ދިގު ހެދުމެއް ނަމަ ހެދުމުގެ އަތް އަތުގެ ކުޑަހުޅަށް ވުރެ ކުރުވެގެން ނުވާނެ އެވެ.

އިސްލާހުގައި ވަނީ ހެދުން އަރިމަތިން، ފުރަގަކުން ނުވަތަ ތިރިން ފަޅާފައި ހުންނަ ނަމަ، އެބައި ހުންނަންވާނީ އުސޫލުގައި ވާގޮތުން މައްޗަށް އަތް ދަމާލުމުން ހަށިގަނޑުގެ އެއްވެސް ތަނެއް ނުފެންނަ ވަރަށް، ބުޑުގެ ތިރީ ކައިރިން ފެށިގެން މައްޗަށް ދެ އިންޗިއަށް ވުރެ ކުރުނުވާ ވަރަށް ކަމަށެވެ.

އެކަމަކު މޭކަޕް އަދި ގަހަނާ ބޭނުންކުރެވޭނެ އެވެ.

މީގެއިތުރުން ފިރިހެން މުވައްޒަފުން ހެދުން އެޅުމުގެ އުސޫލަށް ވެސް ވަނީ ބަދަލު ގެނެސްފަ އެވެ. އިސްލާހުގައި ބުނެފައިވަނީ އަތް ދިގު ގަމީހެއް ނަމަ އަތުގެ ކުޑަހުޅާއި ހަމަޔަށް އަދި އަތްކުރު ގަމީހެއް ނަމަ، އަތް ހުންނަންވާނީ އަތުގެ އުޅަނބޮއްޓަށް ވުރެ 2 އިންޗި ކުރުނުވާ ވަރަށް ކަމަށެވެ. އަދި ބޭރަށް ބަހައްޓާ ގޮތަށް، އޮފީސް ގަމީހުގެ ގޮތުގައި ފަހައިފައި ހުންނަ އަތްދިގު ބުސް ގަމީސް ފިޔަވައި އެހެން ގަމީސްތައް ދަށަށް ޖަހަންވާނެ ކަމަށް ވެސް ވެއެވެ. އިސްލާހުގައި ބުނަނީ ގަމީސް ދަށަށް ޖަހައިފައި ހުންނައިރު ހުންނަންވާނީ ބެގީކުރުމުން އަޅައިފައި ހުންނަ ކަމަރު އެއްކޮށް ނުފޮރުވޭ ވަރަށް ކަމަށެވެ. އަދި ފިރިހެން މުވައްޒަފުންނަށް މޭކަޕްއާއި އަނގޮޓި ފިޔަވައި އެހެން ގަހަނާ ބޭނުންކުރުން މަނާ ވާނެ ކަމަށް ވެސް ވެ އެވެ.

މިފަދަ ބަދަލެއް ގެނެސްފައިމިވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިފަހުން ރައްޔިތުންނާއެކު ބޭއްވި ބައްދަލުވުންތަކުގައި، ސިވިލް ސާވިސްގެ މުވައްޒަފުން މުޖުތަމުގެ އަހުލާގީ މިންގަނޑާ ހިލާފަށް ހެދުން އަޅާކަމުގެ ޝަކުވާ އެމަނިކުފާނަށް ލިބިވަޑައިގެންފައިވަނިކޮށެވެ.