ހދ. ހިރިމަރަދޫގެ ރައްޔިތުން އެ އަތޮޅުގެ ހަނިމާދު އަށް ބަދަލުކޮށް ރައީސް ގަރާރެއް ނެރުއްވައިފި އެވެ.
މިގޮތަށް ރައީސް މިކަން ނިންމެވީ، ހިރިމަރަދޫއަކީ މީހުން ދިރިއުޅޭ ރަށެއް ނޫންކަމަށް ކަނޑައަޅައި، އެ ރަށުގެ ރައްޔިތުން ހަނިމާދޫގައި އާބާދުކުރުމަށް މަގުފަހިކުރުމުގެ ގޮތުންނެވެ.
އާބާދީގައި 300 ހަމަނުވާ ހިރަމަރަދޫ ރައްޔިތުން އެ އަތޮޅު ހަނިމާދުއަށް ބަދަލުކުރަން ސަރުކާރުން ނިންމީ މިދިޔަ އޮގަސްޓު މަހުގަ އެވެ. އަދި މިދިޔަ އޮގަސްޓް މަހު ރައީސް ހިރިމަރަދޫއަށް ވަޑައިގަތުމުން އެ ރަށު ރައްޔިތުންވެސް ވަނީ ހަނިމާދޫއަށް ބަދަލުކޮށްދިނުމަށް އެދިފަ އެވެ.
ރައީސް އޮފީހުން މިއަދު ނެރުނު ބަޔާނުގައި ބުނި ގޮތުގައި މި އިސްލާހު ގެނައުމުގެ މައިގަނޑު ބޭނުމަކީ، އަންނަ އަހަރު އޭޕްރީލް މަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބާ ގުޅިގެން ހިރިމަރަދޫގެ ރައްޔިތުންގެ އިންތިހާބީ ދާއިރާ ކަނޑައެޅުމަށެވެ. ހިރިމަރަދޫ ރަށްވެހިން ހަނިމާދޫއަށް ބަދަލުކުރުމުގެ މަސައްކަތް ސަރުކާރުން ކުރަމުންދާ މަރުހަލާގެ ތެރޭގައި މި އިންތިހާބުތައް އަންނާތީ، ގާނޫނީ ގޮތުން ރައްޔިތުންގެ އިންތިހާބީ ދާއިރާއަކަށް ވާނީ އެމީހުން އަލަށް ބަދަލުކުރެވުނު ރަށެވެ. މިގޮތުން، ހިރިމަރަދޫގެ ރައްޔިތުންގެ އިންތިހާބީ ދާއިރާއަކީ ހަނިމާދޫގެ ގޮތުގައި ވަނީ ކަނޑައަޅާފަ އެވެ.
މީގެއިތުރުން މި ގަރާރާއެކު، ހިރިމަރަދޫގެ ރައްޔިތުން ހަނިމާދޫގައި އާބާދުކޮށް ރަޖިސްޓަރީކޮށް ނިމުމުން، ހިރިމަރަދޫއަކީ މީހުން ދިރިއުޅޭ ރަށެއް ނޫންކަމަށް ކަނޑައެޅުއްވުމަށް ނިންމަވައި، ދިވެހިރާއްޖޭގައި މީހުން ދިރިއުޅޭ ރަށްތަކުގެ ލިސްޓުން ހިރިމަރަދޫ އުނިކޮށް، އެ ލިސްޓު ވަނީ އަދާހަމަވެސްކޮށްފަ އެވެ. ނަމަވެސް، މި ގަރާރުގައި ވާގޮތުން އިސްލާހު ކުރި ލިސްޓަށް އަމަލުކުރަން ފަށާނީ، ހިރިމަރަދޫގެ ރައްޔިތުން ހަނިމާދޫގައި އާބާދުކޮށް ރަޖިސްޓަރީކޮށް ނިމުމުންނެވެ.
ހިރިމަރަދޫ އަކީ 590 އެއްހާ މީހުންގެ އާބާދީއެއް އޮންނަ ރަށެކެވެ. ނަމަވެސް އެ ރަށުގައި ދިރިއުޅެނީ އޭގެ ތެރެއިން 300 އެއްހާ މީހުންނެވެ.
