ގޭންގުތަކުން ހިންގާ ކުށްތައް ހުއްޓުވުމުގެ ގާނޫނުގެ ދަށުން މިހާތަނަށް ގޭންގު ކަނޑައެޅުމުގެ މައްސަލައެއް ޕްރޮސެކިއުޓާ ޖެނެރަލްގެ އޮފީހަށް ހުށަހަޅާފައިވާ ކަމަށް ދިވެހި ފުލުހުންގެ ހިދުމަތުން ބުނެފި އެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި، ގޭންގް ކްރައިމް އެންފޯސްމެންޓް ޑިޕާޓްމަންޓްގެ ހެޑް، ސުޕްރިންޓެންޑެންޓް އޮފް ޕޮލިސް އިސްހާގް އާދަމް ވިދާޅުވީ ގޭންގެއް ގޮތުގައި ކަނޑައަޅަން ޕީޖީ އޮފީހަށް މައްސަލައެއް ފޮނުވާފައިވާކަމަށާއި އެ މައްސަލައާ ގުޅިގެން އެ އޮފީހުން ލަފާ ދިން ކަންތައްތައް ފުލުހުން ކުރަމުން އަންނަ ކަމަށެވެ.
"ގޭންގު ކަނޑައެޅުމަށްޓަކައި އެއް މައްސަލައެއް ޕްރޮސެކިއުޓަރު ޖެނެރަލުގެ އޮފީހަށް ފޮނުވިފަވޭ، އެހެން ނަމަވެސް އެ އޮފީހުން އަދި ބައެއް ކަންކަން ސާފުކުރުމަށް އަޅުގަނޑުމެންނަށް އަންގައިފަ ވާތީ އެ މަސައްކަތް މި ދަނީ ކުރަމުން،"
ގޭންގު ހުއްޓުވާ ގާނޫނުގައިވާ ގޮތުން ގޭންގެއް ގޮތުގައި ކުށްކުރާ ގުރޫޕެއް ކަނޑައެޅުމަށް ފުލުހުން ފޮނުވަނީ ޕްރޮސެކިއުޓަރު ޖެނެރަލްގެ އޮފީހަށެވެ. އެ އޮފީހުން ފުރިހަމަކުރަންޖެހޭ ކަންކަން ކުރުމަށްފަހު ދެން އޮންނާނީ ހައިކޯޓަށް ހުށަހެޅުމެވެ. ގާނޫނުގައިވާ ގޮތުން، ގޭންގެއް ގޮތުގައި ކަނޑައެޅުމުގެ ކުރިން އެ މީހުންނަށް ޖަވާބުދާރީވުމުގެ ފުރުސަތުވެސް އޮންނާނެ އެވެ. ކުށްކުރާ ގުރޫޕެއް ގޭންގެއް ގޮތުގައި ހައިކޯޓުން ކަނޑައަޅާނީ ނުވަތަ ކަނޑަނާޅާނީ އޭގެ ފަހުންނެވެ.
އިސްހާގް އިތުރަށް ވިދާޅުވީ، މާލޭގެ އިތުރުން އަތޮޅު ތެރެއިންވެސް ގޭންގެއް ކަމަށް ޝަރުތުހަމަވާ ފަރާތްތަކަކީ ކޮބައިތޯ ބަލަމުން އަންނަ ކަމަށާއި ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނަށް އަމަލުކުރަން ފެށި ފަހުން އެފަދަ ކުށްތައް މަދުވެފައިވާކަން ފާހަގަކުރެވިފައިވާކަމަށެވެ.
