’ވަން ޗައިނާ ޕޮލިސީ’އަށް ދިވެހި ރާއްޖެ ތާއީދުކުރާނެކަމަށާއި މި ސިޔާސަތުގެ މަތީގައި ރާއްޖެ ދެމި އޮންނާނެކަމަށް ދިވެހި ސަރުކާރުން ބުނެފި އެވެ.
ފޮރިން މިނިސްޓްރީއިން ނެރުނު ބަޔާނެއްގައި ބުނީ، ދިވެހި ސަރުކާރުން "ވަން ޗައިނާ ޕޮލިސީ" އަށް ސާބިތުކަމާއެކު ތާއީދުކުރާކަމަށް އަބަދުވެސް ބުނާ ބުނުން ތަކުރާރު ކޮށްފަ އެވެ. އަދި މުޅި ޗައިނާ ތަމްސީލުކުރާ ހަމައެކަނި ގާނޫނީ ސަރުކާރަކީ ޕީޕަލްސް ރިޕަބްލިކް އޮފް ޗައިނާ ކަމަށް ގަބޫލުކުރާ ކަމަށާއި މީގެއިތުރުން، ޓައިވާނަކީ ޗައިނާގެ ސަރަހައްދުގެ ބައެއްގެ ގޮތުގައި ރާއްޖެ ބަލައިގަންނަ ގަތުން އަދިވެސް އެގޮތުގައި އެބައޮތް ކަމަށް ބަޔާނުގައި ބުންޏެވެ.
މީގެއިތުރުން، 1972 ވަނަ އަހަރު ޗައިނާއާ ދެމެދު ސިޔާސީ ގުޅުން ގާއިމުކުރި ފަހުން މި ސިޔާސަތުގައި ރާއްޖެއިން ހިފަހައްޓަމުން އަންނަކަމަށާއި މިއީ ދިވެހިރާއްޖެއިން، ސަރަޙައްދީ އެއްބައިވަންތަކަމާއި، އަދި އެއްބަޔަކު އަނެއްބަޔަކަށް އިޙްތިރާމްކުރުމުގެ ހެއްކެއްކަމަށްވެސް ބަޔާނުގައިވެ އެވެ.
ރާއްޖޭން ޗައިނާއާ އެކު 1972 ވަނަ އަަހަރު ޑިޕްލޮމެޓިކް ގުޅުން ގާއިމްކުރި ފަހުން މިއަދާ ހަމައަށް ވެސް ދަމަހައްޓަމުން އަންނަނީ އެ ސިޔާސަތު ކަމަށާއި އެއީ ގައުމުތަކުގެ ސިޔާދަތަށް ރާއްޖޭން ކުރާ އިހުތިރާމް ކަމަށް ވެސް އެ ބަޔާނުގައި ބުންޏެވެ.
