ގޭންގުތަކުން ހިންގާ ކުށްތައް ހުއްޓުވުމުގެ ގާނޫނަށް އަމަލުކުރަން ފެށުމުން ގޭންގުތަކުން ކުށްކުރުން މަދުވެއްޖެކަމަށް ދިވެހި ފުލުހުންގެ އިދާރާއިން ބުނެފި އެވެ.

ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ފުލުހުންގެ ގޭންގު ކްރައިމް އެންފޯސްމަންޓުގެ ހެޑް ސުޕްރިންޓެންޑެންޓު އިސްހާގް އާދަމް ވިދާޅުވި ގޮތުގައި، މިހާރު ގޭންގު ހަދައިގެން ކުށްކުރުމުގެ ހަރަކާތްތައް ވަނީ ބޮޑުތަނުން މަދުވެފަ އެވެ. އެގޮތުން މާލެ އަދި އަތޮޅުތެރޭގައިވެސް މީގެކުރިން ޖަމާއަތް ހަދައިގެން އެކިއެކި ގޭންގުތަކުގެ ކުށްކުރުމުގެ ރެކޯޑު އޮންނަ، ކުށްކުރާ ފަރާތްތަކުގެ ހަރަކާތްތައް މަދުވެފައިވާ ކަމަށް އޭނާ ވިދާޅުވިި އެވެ.

"ގާނޫނަށް އަމަލުކުރަން ފެށުމާއެކު، ފާހަގަ ކުރެވުނު އެއް ކަމަކީ އެކިއެކި ޖަމާއަތްތައް ހަދައިގެން އެކިއެކި ގޭންގުތަކުގެ ސިފައިގައި ކުށް ކުރުމުގެ ރިކޯޑް އޮންނަ، ކުށް ކުރާ ފަރާތްތަކުގެ ހަރަކާތްތައް އަތޮޅު ތެރެއިން ވެސް އަދި މާލޭން ވެސް ވަރަށް މަދުވެފައިވާކަން."

އިސްހާގު އިތުރަށް ވިދާޅުވީ ގާނޫނުގެ ދަށުން ފުލުހުންގެ ތަހްގީގުތަކުގެ އިތުރުން ގޭންގްތަކުގެ ހަރަކާތްތައް ހުއްޓުވަން ވެސް ހާއްސަ އިސްކަމެއް ދީފައިވާ ކަމަށެވެ. އެގޮތުން މި ގާނޫނުގެ ދަށުން ފުލުހުންގެ މަސައްކަތްތައް މައިގަނޑު ގޮތެއްގައި ބައްޓަންކުރެވިފައިވަނީ ތަހުގީގީ މަސައްކަތްތަކުގެ އިތުރުން ޕްރޮޖެކްޓިވް ޕްރިވެންޓިން މަސައްކަތެއްގެ ގޮތުގައި ކަމަށް އޭނާ ވިދާޅުވި އެވެ.

"އަޅުގަނޑުމެންނަށް ފާހަގަކުރެވޭ ކުށްކުރާ ގުރޫޕުތައް ހަރަކާތްތެރިވާ ކުށުގެ ރެކޯޑު އޮންނަ ފަރާތްތައް ޖަމާވާ ތަންތަން، އަޅުގަނޑުމެންގެ ޓީމުތަކުން 24 ގަޑިއިރު އެކި ވަގުތުތަކުގައި، އެކިއިރުގައި އެ ތަންތަނަށް ގޮސް، އެ ތަންތަން ބަލައި ޗެކްކޮށް، އެތަނުގައި ތިބީ ކޮން ބައެއްތޯ، އެތަނުގައި ތިބި ބައެއް ކުރަނީ ކީއްތޯ ބަލައި، އެ މީހުން އެ ތަންތަނުން ފޮނުވާލުމުގެ މަސައްކަތް ކުރޭ."

އިސްހާގް ވިދާޅުވީ ކުށްކުރާ ގުރޫޕުތައް ހަރަކާތްތެރިވާ ތަންތަނުގެ ތެރެއިން ފުލުހުންނަށް އަދި ބެލިފައި ނުވާ ތަންތަނުގައި، ކުށުގެ ރެކޯޑު އޮންނަ މީހުންނާ އެކީ ގިނަ ކުޑަކުދިން ގިނަ ވަގުތު ހޭދަކުރާ ކަން ފުލުހުންނަށް ފާހަގަވެފައިވާ ކަމަށެވެ. އެހެންކަމުން އެކަންކަމާމެދު ބެލެނިވެރިން ސަމާލުވުމަށް އޭނާ ވަނީ އިލްތިމާސްކޮށްފަ އެވެ. އަދި އެފަދަ ތަންތަނުގައި ތިބޭ ކުދިން ފުލުހުންގެ ބެލުމުގެ ދަށަށް ގެނައުމަށްފަހު، އެ ކުދިންގެ ބެލެނިވެރިންނަށް ގުޅައި، އެކަމާ ގުޅޭ މައުލޫމާތު ދިނުމަށްފަހު ބެލެނިވެރިންނާ ކުދިން ހަވާލުކުރަމުންދާކަމަށް ވެސް އޭނާ ފާހަގަކުރެއްވި އެވެ.

ގޭންގް ކުށްތައް ހުއްޓުވުމުގެ ގާނޫނަށް އަމަލު ކުރަން ފެށީ މި އަހަރުގެ އޮގަސްޓް މަހުގެ ތެރޭގަ އެވެ. އެ ގާނޫގައި ބޮޑެތި އަދަބުތައް ވެސް ކަނޑައަޅާފައިވެ އެވެ.