ސަރުކާރުން އިއްޔެ އާއްމުކުރި މާލެ ސަރަހައްދުން ގޯއްޗާއި ފްލެޓު އުސޫލުގެ އެކުލަވާލީ ރައްޔިތުން ބޭނުންވި ގޮތަށް ކަމަށް ހައުސިން މިނިސްޓްރީން ބުނެފި އެވެ.

ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން، "އާއިލީ ބޯހިޔަވަހިކަން" ޕްރޮގްރާމްގެ އުސޫލުތައް މިހާރު ވަނީ ސަރުކާރުގެ ގެޒެޓުގައި ޝާއިއުކޮށްފަ އެވެ.  އެ އުސޫލުގެ ދަށުން މާލެ ސަރަހައްދުން ފްލެޓާއ ގޯތި ދޫކުރާނީ މާލޭގައި ދިރިއުޅޭ މީހުން ދެ ކެޓަގަރީއަކަށް ބަހާލައިގެން ނެވެ. އެެއީ މާލޭގެ ރަށްވެހިންނާއި މާލޭގައި ދިރިއުޅޭ އެހެން ރަށްރަށުގެ މީހުންނެވެ

މި އުސޫލާ ގުޅިގެން ހައުސިން މިނިސްޓްރީން ނެރުނު ބަޔާނުގައި ބުނި ގޮތުގައި ގޯއްޗައި ފްލެޓަށް އެދުމުގެ ފުރުސަތު އަންނަ މަހުގެ 15 އިން އަންނަ އޭޕްރިލް 14 ގެ ނިޔަލަށް ހުޅުވާލާނެ ކަމަށެވެ.

މީގެ ކުރިން ނެރުނު އުސޫލަށް ބަދަލު ގެނެސް އާ އުސޫލެއް އާންމު ކުރީ، ރައީސް މާލޭގެ ރައްޔިތުންނާ އެކު ބޭއްވި ސިލްސިލާ ބައްދަލްވުންތަކުގައި ގިނަ ބަޔަކު ކުރިން ކަނޑައަޅާފައިވާ އުސޫލާ މެދު ކަންބޮޑުވުން ފާޅުކޮށްފައި ވާތީ އެވެ. އެހެންވެ މި ބައްދަލްވުންތަކުން ލިބުނު ހިޔާލުތަކަށް ރިއާޔަތްކޮށް، މިނިސްޓްރީއިން އެ އުސޫލަށް ބަދަލު ގެނައީ ކަމަށެވެ.

މި އުސޫލަށް ގެނެސްފައިވާ މައިގަނޑު ބަދަލުތަކަކީ، ސަރުކާރުގެ ބޯހިޔާވަހިކަމުގެ ޕްރޮގްރާމަކުން އެއް ކޮޓަރީގެ ފްލެޓެއް ލިބި، އެމީހެއްގެ 18 އަހަރުން ދަށުގެ ކުދިން ތިބި ނަމަ އެތަނެއް ސަރުކާރުން ކަނޑައަޅާ އުސޫލެއްގެ ދަށުން ދޫކޮށްލާ ނަމަ، އަލުން ފްލެޓަށް ކުރިމަތިލުމުގެ ފުރުސަތު ލިބުމެވެ. އަދި، ދެ ކޮޓަރީގެ ހައުސިން ޔުނިޓެއް ލިބި، 18 އަހަރުން ދަށުގެ ދެ ޖިންސުގެ ދަރިން ތިބި ނަމަ، އެތަނެއް ސަރުކާރުން ކަނޑައަޅާ ގޮތެއްގެ މަތިން ދޫކޮށްލަން އެއްބަސްވާ ނަމަ ވެސް އަލުން ފްލެޓަށް ކުރިމަތިލެވޭނެ އެވެ.

މީގެއިތުރުން، އެޕްލިކެންޓުގެ އަނބިމީހާ ނުވަތަ ފިރިމީހާއަށް ގްރޭޓާ މާލެ ސަރަހައްދު ފިޔަވާ އެހެން ސަރަޖައްދަކުން 400 އަކަފޫޓަށް ވުރެ ބޮޑު ބިމެއް އޮތްނަމަވެސް ކުރިމަތި ލުމުގެ ފުރުސަތު ލިބެ އެވެ.

ސަރުކާރުގެ މި ބޯހިޔާވަހިކަމުގެ ސިޔާސަތުގެ ދަށުން ގްރޭޓާ މާލެ ސަރަހައްދުގައި 7،900 ފްލެޓު އަޅަން ވަނީ ނިންމައިފަ އެވެ. އެ އުސޫލުގެ ދަށުން މާލެ ސަރަހައްދުން ފްލެޓު ދޫކުރާނީ މާލޭގައި ދިރިއުޅޭ މީހުން ދެ ކެޓަގަރީއަކަށް ބަހާލައިގެން ނެވެ. އެެއީ މާލޭގެ ރަށްވެހިންނާއި މާލޭގައި ދިރިއުޅޭ އެހެން ރަށްރަށުގެ މީހުންނެވެ.

އެގޮތުން، މާލޭގެ ރަށްވެހިންނަށް 4,000 ފްލެޓް، 18 އަހަރުން ދަށުގެ ކުދިން ބަލާ އެކަނިވެރި މައިންނާއި އެކަނިވެރި ބަފައިންނަށް 100 ފްލެޓް އަދި ނުކުޅެދުންތެރިކަން ހުންނަ ފަރާތްތަކަށް ވަނީ 100 ފްލެޓް ކަނޑައަޅާފަ އެވެ. އަދި، ޒުވާނުންނަށް 250 ފްލެޓް ކަނޑައަޅާފައިވާއިރު މާލޭގައި އާއިލާ ބިނާކޮށްފައިވާ ޖުޑީޝިއަރީގެ މުވައްޒަފުންނަށް 100 ފްލެޓް އަދި ފުލުުހުންނާއި ސިފައިން އަދި ކަރެކްޝަންގެ މުވައްޒިފުންނަށް ހާއްސަކޮށް ކޮންމެ މުއައްސަސާއަކަށް 100 ފްލެޓް ވަނީ ކަނޑައަޅާފަ އެވެ.

އެކަށީގެންވާ ބޯހިޔާވަހިކަން ނެތް މީހުންނަށް، ބޯހިޔާވަހިކަން ފަހިކޮށްދިނުމަކީ މި ސަރުކާރުގެ އެންމެ މުހިއްމު އެއް ސިޔާސަތެވެ.