ކަރްނާޓަކާ އިންޓަނޭޝަނަލް ފިލްމް ފެސްޓިވަލް (ކޭއައިއެފްއެފް) ގައި ރާއްޖޭގެ ފީޗާ ފިލްމު "ކަމަނަ"އަށް ތިން އެވޯޑެއް ލިބިއްޖެ އެވެ.
"ކަމަނަ" ފިލްމަށް ލިބިފައިވާ އެވޯޑް ތަކަކީ، އެންމެ މޮޅު ޑައިރެކްޓަރު، އެންމެ މޮޅު ލީޑް އެކްޓަރު އަދި އެންމެ މޮޅު ލީޑް އެކްޓްރެސްގެ އެވޯޑެވެ. "ކަމަނަ" އަކީ މަހްދީ އަހުމަދު ލިޔެ، ހުސެއިން މުނައްވަރު ޑައިރެކްޓް ކޮށްފައިވާ ފިލްމެކެވެ. ސޯޝަލް މީޑިއާގައި ކުރި ޕޯސްޓެއްގައި މި ފިލްމުގެ ޑައިރެކްޓަރު ހުސައިން ބުނީ މި އޮވޯޑަކީ މުޅި ދިވެހި ފިލްމު އިންޑަސްޓްރީއަށް ލިބުނު ޝަރަފެއް ކަމަށެވެ.
މީގެއިތުރުން، މަހްދީ އަހުމަދާއި، މިއުޒިކް ޓީމާއި، ޓެކްނިކަލް ކްރޫއަށް ވެސް ހުސައިން ވަނީ ޝުކުރު އަދާކޮށްފަ އެވެ. އޭނާ ބުނީ ފިލްމަށް ލިބުނު ކާމިޔާބީ އަކީ އެ ފިލްމުގައި ފެނިގެން ދިޔަ ކޮންމެ އެކްޓަރެއްގެ ވެސް ކާމިޔާބީ ކަމަށާއި "ކަމަނަ" އަކީ އެވޯޑް ހޯދުމުގެ ނިޔަތުގައި އުފައްދާފައިވާ ފިލްމެއް ނޫން ކަމަށެވެ. އޭގެ ބަދަލުގައި މި ފިލްމަކީ ދަތިތަކާ ކުރިމަތިލާން ޖެހިފައިވާ އަންހެނެއްގެ ވޭނާއި އާދޭސްތައް ދައްކުވައިދޭ ފިލްމެއް ކަމަށް އޭނާ ބުންޏެވެ.
"ކަމަނަ" ފިލްމުގެ ކާސްޓުންގެ ތެރޭގައި ހިމެނެނީ، މަރިޔަމް އައްޒަ، ޔޫސުފް ޝަފީއު (ޔޫއްޕޭ) އަދި އައިމިނަތު ރަޝްފާ (އާޝާ)އެވެ. އަދި މުހައްމަދު މަނިކް، އަހުމަދު ނިމާލް، މުހައްމަދު ރަޝީދު (ދަރާ ރަޝީދު) އަދި ނަތާޝާ ޖަލީލްވެސް ހިމެނެ އެވެ.
