އެއް ކޮޓަރީގެ ފްލެޓު ދޫކޮށްލައި އެހެން ފްލެޓަކަށް ކުރިމަތިލެވޭނެ ގޮތަށް އުސޫލު ބަދަލުކޮށް، މާލޭގައި ދިރިއުޅޭ ރައްޔިތުންނަށް ފްލެޓު ދޫކުރުމުގެ އުސޫލު އަލުން އާންމުކޮށްފި އެވެ.

ސަރުކާރުގެ މި ބޯހިޔާވަހިކަމުގެ ސިޔާސަތުގެ ދަށުން ގްރޭޓާ މާލެ ސަރަހައްދުގައި 7،500 ފްލެޓު އަޅަން ވަނީ ނިންމައިފަ އެވެ. އެ އުސޫލުގެ ދަށުން މާލެ ސަރަހައްދުން ފްލެޓު ދޫކުރާނީ މާލޭގައި ދިރިއުޅޭ މީހުން ދެ ކެޓަގަރީއަކަށް ބަހާލައިގެން ނެވެ. އެެއީ މާލޭގެ ރަށްވެހިންނާއި މާލޭގައި ދިރިއުޅޭ އެހެން ރަށްރަށުގެ މީހުންނެވެ.

ހައުސިން މިނިސްޓްރީން އާންމުކުރި އުސޫލުގައިވާ ގޮތުގައި ސަރުކާރުގެ ބޯހިޔާވަހިކަމުގެ ޕްރޮގްރާމަކުން އެއް ކޮޓަރީގެ ފްލެޓެއް ލިބި، އެމީހެއްގެ 18 އަހަރުން ދަށުގެ ކުދިން ތިބި ނަމަ އެތަނެއް ސަރުކާރުން ކަނޑައަޅާ އުސޫލެއްގެ ދަށުން ދޫކޮށްލާ ނަމަ، އަލުން ފްލެޓަށް ކުރިމަތިލެވޭނެ އެވެ. މީގެއިތުރުން، ދެ ކޮޓަރީގެ ހައުސިން ޔުނިޓެއް ލިބި، 18 އަހަރުން ދަށުގެ ދެ ޖިންސުގެ ދަރިން ތިބި ނަމަ، އެތަނެއް ސަރުކާރުން ކަނޑައަޅާ ގޮތެއްގެ މަތިން ދޫކޮށްލަން އެއްބަސްވާ ނަމަ ވެސް އަލުން ފްލެޓަށް ކުރިމަތިލެވޭނެ އެވެ.

މި ބަދަލު ގެނެސްފައި ވަނީ، ރައީސް މި ފަހުން މާލޭ އަވަށުތަކުގެ ރައްޔިތުންނާ އެކު ބޭއްވި ބައްދަލުވުންތަކުގައި، އެއް ކޮޓަރީގެ ފްލެޓް ލިބިފައި ތިބި މީހުންނަށް އިތުރު ހައުސިން ސްކީމަކަށް ކުރިމަތިނުލެވޭތީ ނުވަތަ ޝަރުތު ހަމަނުވާތީ އެ މީހުންގެ ކަންބޮޑުވުންތައް ހިއްސާކުރުމުންނެވެ. އަދި، ހިޔާ ފްލެޓު ލިބުނު މީހުންގެ ތެރެއިން ބައެއް މީހުން ވެސް ވަނީ ދެ ކޮޓަރީގެ އެޕާޓުމެންޓް ދޫކޮށްލާ ނަމަ، ބޯހިޔާވަހިކަމުގެ އެހެން ސްކީމަކަށް ކުރިމަތިލެވޭ ގޮތަށް އުސޫލު ބަދަލުކުރަން އެދިފަ އެވެ.

މި އުސޫލުގައި ބުނާގޮތުން، ފްލެޓު ދޭއިރު، އެޕްލިކޭޝަން ހުށަހަޅާ މީހާގެ ދިރިއުޅުމުގެ ހާލަތަށް ބަލައި ޝަރުތު ހަމަވަނީ ކިތައް ކޮޓަރީގެ ފްލެޓަށް ކަން ނިންމާނީ ހައުސިން މިނިސްޓްރީންނެވެ. އެޕްލިކޭޝަން ހުށަހަޅާއިރު ދޭއް ނުވަތަ ތިން ކޮޓަރީގެ ފްލެޓުގެ ތެރެއިން ބޭނުންވަނީ ކިތައް ކޮޓަރީގެ ފްލެޓެއް ކަން ބަޔާންކުރުމުގެ ފުރުސަތު ލިބޭނެ އެވެ. ނަމަވެސް، އެޕްލިކަންޓަށް ލިބޭނީ ކިތައް ކޮޓަރީގެ ފްލެޓެއް ކަން ނިންމާނީ އިވެލުއޭޝަން މަރުހަލާ ނިންމުމަށް ފަހު މިނިސްޓްރީން ކަމަށް އެ އުސޫލުގައި އޮތެވެ.

ފްލެޓަށް ކުރިމަތިލާއިރު އެންމެ ގިނައިން ލިބޭނީ 175 ޕޮއިންޓެވެ. އެގޮތުން އުފަންވީއިރުން ފެށިގެން މާލޭގެ ގެއެއްގައި ރަޖިސްޓަރީވެފައިވާ މީހުންނަށް 40 ޕޮއިންޓު ލިބެ އެވެ. އަދި، ދަފުތަރުގައި ރަޖިސްޓަރީވެފައިވާތާ 5 އަހަރަށް ވުރެ ގިނަ ދުވަސްވުމުން 20 ޕޮއިންޓާއި، 15 އަހަރަށް ވުރެ ގިނަ ދުވަސްވުމުން 30 ޕޮއިންޓު އަދި 25 އަހަރަށް ވުރެ ގިނަ ދުވަސްވުމުން 40 ޕޮއިންޓު ލިބެ އެވެ.

މީގެއިތުރުން، މާލޭގައި ފަހުން ރަޖިސްޓަރީވެ 5 އަހަރަށް ވުރެ ގިނަ ދުވަސްވުމުން 20 ޕޮއިންޓާއި، 15 އަހަރަށް ވުރެ ގިނަ ދުވަސްވުމުން 30 ޕޮއިންޓު އަދި 25 އަހަރަށް ވުރެ ގިނަ ދުވަސްވުމުން 40 ޕޮއިންޓު ލިބެ އެވެ.