ޓެރަރިސްޓް ޖަމާޢަތެއް ކަމަށްވާ އިސްލާމިކް ސްޓޭޓް (އައިއެސް) ގެ ޚަބަރު ފަތުރާ މީޑިއާތަކުގައި ހަރަކާތްތެރިވާ ކަމަށް ތުހުމަތުވާ ހޫދު މުހައްމަދު ޒާހިރުގެ މައްޗަށް 3 ދައުވާއެއް ސާބިތުވެ، 23 އަހަރަށް ޖަލަށް ލުމަށް ކްރިމިނަލް ކޯޓުން މިއަދު ހުކުމްކޮށްފި އެވެ.
ބޭރުގެ އިންޓެލިޖެންސް އިދާރާތަކުގެ އެހީގައި 2022 ވަނަ އަހަރު ހައްޔަރުކުރި ހޫދަކީ ޕީޖީން ބުނިގޮތުގައި 2015 ވަނަ އަހަރުން ފެށިގެން 2022 ވަނަ އަހަރުގެ ޖަނަވަރީ މަހުގެ 6 ވަނަ ދުވަހުގެ ނިޔަލަށް، ތަފާތު އެކި ދުވަސްމަތިން، ތަފާތު ނަންނަމުގައި ސޯޝަލް މީޑިއާ އެކައުންޓްތައް އުފައްދައިގެން ހަރަކާތްތެރިވި މީހެއް ކަމަށެވެ. އެ އެކައުންޓުތައް ބޭނުންކޮށްފައިވަނީ އޭނާގެ ފޯނުން ނެވެ. ޕީޖީން ބުނީ:.
- އޭނާ އައިއެސް އާ ގުޅުންހުރި މަޢުލޫމާތާއި ޚަބަރު ގެނެސްދޭ ސޯޝަލް މީޑިއާގެ އޮންލައިން ގްރޫޕްތަކުގައި، އެފަދަ އަމަލުތަކާ ގުޅޭ އެކި ބަސްބަހުން ތައްޔާރުކޮށްފައިވާ ލިޔުންތަކާއި، ފޮޓޯތަކާއި، ވީޑިއޯތައް ހިއްސާކޮށްފަ
- އެކަމުގައި ގިނަ ވަގުތުތަކެއް ހޭދަކޮށް، އެކި ބަސްބަހުން ލިޔެފައިވާ އައިއެސް ޕްރޮޕެގެންޑާ ފެތުރުމަށް ބޭނުންކުރާ ލިޔުންތައް އެހެން މީހުންނަށް ފޯރުކޮށްދިން.އެކި ބަސްބަހުން ތައްޔާރުކޮށްފައިވާ ލިޔެކިޔުންތައް ތަރުޖަމާކުރުމަށްޓަކައި އެކި މީހުންނާ މުއާމަލާތުކޮށްގެން އެ މަސައްކަތްކުރި
- ސޯޝަލް މީޑިއާގެ އެކި އޮންލައިން ޕްލެޓްފޯމްތަކުގައި އައިއެސް އަށް ތާއީދުކޮށްފައިވޭ
- އެކި ގައުމުތަކުގައި ތިބި އިސްލާމިކް ސްޓޭޓް ޖަމާއަތަށް ތާއިދުކުރާ މީހުންނާ އޭނާ މުއާމަލާތުކުރި
" އެކަންކަން ކުރުމަށާއި ސިއްރުކުރުމަށާއި އޮޅުވާލުމަށް ބޭނުންކުރެވިދާނެ ތަފާތު އެކި އެކި އެޕްލިކޭޝަންތައް މީނާ ގަނެގެން މީނާގެ ފޯނަށް އަޅައިގެން މީނާ ޓެރަރިސްޓް ޖަމާޢަތެއްކަމަށްވާ އިސްލާމިކް ސްޓޭޓްގެ (އައި.އެސް.އައި.އެސް) ޚަބަރު ފަތުރާ މީޑިއާ އޮޕަރޭޓްކުރާ މެންބަރެއްގެ ހައިސިއްޔަތުން މަސައްކަތްކޮށްފައިވާތީ މީނާގެ ވަކި ވަކި ޢަމަލުތަކަށް ރިޢާޔަތްކޮށް ޖުމްލަ 5 (ފަހެއް) ދަޢުވާ 18 އޭޕްރީލް 2025 ދުވަހު ކްރިމިނަލް ކޯޓަށް ހުށަހެޅީމެވެ." ޕީޖީ އޮފީހުން ބުންޏެވެ.
އޭނާގެ މައްޗަށް ކުރި 5 ދައުވާގެ ތެރެއިން ތިން ދައުވާތައް ސާބިތުވެ 23 އަހަރަށް ޖަލަށް ލުމަށް ވަނީ ހުކުމްކޮށްފަ އެވެ. އެ ދައުވާތަކަކީ:
- ޓެރަރިސްޓް ޖަމާއަތެއްގެ މެންބަރަކަށްވުން
ގާނޫނުގައިވާ އަދަބު: 10 (ދިހައެއް) އަހަރާއި 15 (ފަނަރަ) އަހަރާ ދެމެދުގެ މުއްދަތަކަށް ޖަލަށްލުން.
ކަނޑައެޅި އަދަބު: 15 (ފަނަރަ) އަހަރަށް ޖަލަށްލުން
- ޓެރަރިސްޓް ޖަމާޢަތަކަށް ތާއީދުކުރުން
ގާނޫނުގައިވާ އަދަބު: 3 (ތިނެއް) އަހަރާއި 5 (ފަހެއް) ދެމެދުގެ މުއްދަތަކަށް ޖަލަށް ލުން
ކަނޑައެޅި އަދަބު: 5 (ފަހެއް) އަހަރަށް ޖަލަށްލުން
- ޓެރަރިސްޓް ޖަމާޢަތަކަށް ތާއީދުކުރާ މީހެއްކަމަށް ދޭހަވާފަދަ ލިޔުމާއި، ކުރެހުމާއި، ފޮޓޯ ގެންގުޅުން
ގާނޫނުގައިވާ އަދަބު: 1 (އެކެއް) އަހަރާއި 3 (ތިނެއް) އަހަރާއި ދެމެދުގެ މުއްދަތަކަށް ޖަލަށް ލުން
ކަނޑައެޅި އަދަބު: 3 (ތިނެއް) އަހަރަށް ޖަލަށްލުން
އޭނާގެ މައްޗަށް ސާބިތުނުވާ ކަމަށް ކޯޓުން ކަނޑައެޅީ އިންޓަނެޓް މެދުވެރިކޮށް ޓެރަރިޒަމްގެ އަމަލެއް ކުރުމަށް ހިތްވަރު ދިނުމުގެ ދައުވާ އާއި އިންޓަނެޓް މެދުވެރިކޮށް ޓެރަރިސްޓް ޖަމާޢަތެއްގެ ލިޔެކިޔުންތައް ފެތުރުމުގެ ދައުވާ އެވެ.
