ޗޮކްލެޓް ސިރަޕް ފުޅިތަކުގައި ރާއްޖެއަށް ޑްރަގް އެތެރެކުރި މައްސަލާގައި ދެ މީހަކު ހައްޔަރުކޮށްފި އެވެ.
ފުލުހުން ބުނިގޮތުގައި، ދިވެހިރާއްޖެއަށް އެތެރެކޮށްފައިވާ މުދާތަކެއް ޑިސެންބަރު 25 ވަނަ ދުވަހު ކަސްޓަމްސް އިން ބަލައިފާސްކުރިއިރު އެމުދާތަކުގެ ތެރެއިން ޗޮކްލެޓް ސިރަޕް ފުޅިތަކެއްގެ ތެރޭގައި ގިނަ އަދަދެއްގެ މަސްތުވާތަކެތި ވަނީ ފެނިފަ އެވެ.
މި މައްސަލައާ ގުޅިގެން ހައްޔަރުކޮށްފައިވަނީ ހއ. ހޯރަފުށި، އާފިޔާ، އަހްމަދު އަލީ (47އ) އާއި މާލެ، ގ. އުފްރިޔާ، މުހައްމަދު އާދިލް (57އ) އެވެ. އެގޮތުން އަހްމަދު އަލީ ހައްޔަރުކޮށްފައިވަނީ ޑިސެންބަރު 26 ވަނަ ދުވަހު އެވެ. އަދި މުހައްމަދު އާދިލް ހައްޔަރުކުރީ އޭގެ އަނެއް ދުވަހު ކަމަށްވާ ޑިސެންބަރު 27ގަ އެވެ.
ފުލުހުން ބުނިގޮތުގައި އެދެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ވަނީ 5 ދުވަހުގެ ބަންދުގެ މުއްދަތެއް ދީފަ އެވެ.
