ހުޅުމާލެ ފޭސް 3 ހިއްކުމުގެ މަސައްކަތް އަންނަ މަހުގެ 20 ގައި ނިންމާލެވޭނެ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.
މިނިސްޓަރު ވިދާޅުވީ ހުޅުމާލެ ފޭސް 3 ހިއްކުމުގެ މަސައްކަތުގެ ތެރެއިން ހިއްކަން ޖެހޭ 63 ހެކްޓަރުގެ ތެރެއިން 47 ހެކްޓަރުގެ ބިން މިހާރު ހިއްކާ ނިމިފައިވާ ކަމަށެވެ. އަދި މިހާރު ތާވަލްކުރެވިފައިވާ ގޮތުން އަންނަ މަހުގެ 20 އަށް ބިން ހިއްކުމުގެ މަސައްކަތް ނިންމާލެވޭނެ ކަމަށް ވިދާޅުވި އެވެ.
"މިހާރު މަސައްކަތް ޕްލޭން ކުރެވިފައިވާ ގޮތަށް ބަލާއިރު 20 ޖަނަވަރީ 2026އަށް މަސައްކަތް އެއްކޮށް ނިންމާލާ،ރަޖިސްޓްރީ ހެދުމުގެ މަސައްކަތް ކުރިއަށް ގެންދާނަން"
2023 ގައި ހިއްކަން ފަށާފައިވާ ފޭސް 3ގެ މަސަތްކަތް އެކިފަހަރު މަތިން ހުއްޓިފައި އޮތުމަށްފަހު، މިދިޔަ ނޮވެމްބަރު މަހުގެ 10 ވަނަ ދުވަހުން ފެށިގެން އަލުން މަސައްކަތް ވަނީ ފަށާފަ އެވެ.
މީގެއިތުރުން، މިނިސްޓަރު ވަނީ، ރަސްމާލެ ހިއްކުމުގެ މަޝްރޫއުވެސް އަންނަ އަހަރުގެ އޭޕްރީލް މަހަށް ނިންމާލެވޭނެ ކަމަށް ވިދާޅުވެފަ އެވެ. އެގޮތުން އެކި ސައިޓްތަަކަށް ބަހާލާއިގެން 3 ކުންފުންޏަކުން ރަސްމާލެ ހިއްކުމުގެ މަސައްކަތް ކުރަމުން އަންނައިރު، ރަސްމާލެ ހިއްކުމުގެ މަސައްކަތް އަންނަ އަހަރު އޭޕްރީލް މަހަށް ނިންމާލެވޭނެ ކަމަށް މިނިސްޓަރު ވިދާޅުވި އެވެ.
ރަސްމާލެ ތަރައްގީ ކުރުމުގެ ދަށުން މިހާރުވެސް އެތަނުގެ ފެނާއި ނަރުދަމާ ގާއިމްކުރުމަށް އެމްއޯޔޫތަކުގައި ސޮއިކޮށްފައިވާ ކަމަށް މިނިސްޓަރު ވިދާޅުވި އެވެ. އެހެންނަމަވެސް އެތަނުގެ ޑިޒައިން ކުރުމުގެ މަސައްކަތް ފެށިގެންދާނީ، ރަސްމާލެ މާސްޓާ ޕްލޭން ނިމުމުން ކަމަށް ވިދާޅުވި އެވެ.
މިނިސްޓަރު އިތުރަށް ވިދާޅުވީ، ބޯހިޔާވަހިކަން ޕްލޭން ކުރެވެނީ އަންނަން އޮތް ޖީލުތަކަށް ރައްކާތެރިކަން ގާއިމްކޮށްދިނުމަށް ކަމަށެވެ. އެއް ކޮޓަރިން 2 ކޮޓަރިއަށް އަދަދު އިތުރު ކުރުމުގެ ބަދަލުގައި 3 ކޮޓަރިއަށް ސަރުކާރުން އިސްކަންދެނީ އާއިލާތަކަށް ހަމަޖެހިލައިގެން އުޅޭނެ މަގު ތަނަވަސް ކޮށްދިނުމަށް ކަމަށް މިނިސްޓަރު ވިދާޅުވި އެވެ.
