ޔަމަން މިނިވަންކުރުމަށް ސައުދީ އެރޭބިއާއިން ކުރަމުންދާ މަސަތްކަތަށް ދިވެހި ސަރުކާރުން، އެއްބާރުލުން ދޭނެ ކަމަށް ގޮވާލައިފި އެވެ.
ފޮރިން މިނިސްޓްރީއިން މިއަދު ނެރުނު ބަޔާނުގައި ބުނިގޮތުގައި، ޔަމަން މިނިވަންކުރުމަށް ކުރަމުން އަންނަ މަސައްކަތަށް ދިވެހި ސަރުކާރުން ފުރިހަމަ އެއްބާރުލުން ދޭނެ އެވެެ. އަދި ޔަމަނުގައި ހިންގަމުންދާ ހަމަނުޖެހުން ހުއްޓުވައި ޔަމަނުގެ އެކި ސަރަހައްދުތަކުގެ ރައްކާތެރިކަން ކަށަވަރުކުރުމަށް ސައުދީއިން ކުރަމުންދާ މަސައްކަތަށްވެސް ވަނީ ފުރިހަމަ ތަރުހީބެއް ދީފަ އެވެ.
މީގެއިތުރުން، ދިވެހި ސަރުކާރުން ވަނީ ސައުދީއިން ޔަމަނުގައި އަމާންކަން ގާއިމްކޮށް، ގެއްލުންތައް ފޫބެއްދުމަށް ކުރަމުންދާ މަސައްކަތަށް އެއްބާރުލުން ދިނުމަށް ޔަމަނުގެ ޕާޓީތަކަށްވެސް ގޮވާލާފަ އެވެ.
2014 ވަނަ އަހަރު ޔަމަނުގެ ވެރިރަށް ސަނާއާއި ޔަމަނުގެ އުތުރުގެ ބޮޑު ބައެއްގެ ކޮންޓްރޯލް ހޫތީންނަށް ލިބުނު ފަހުން ޔަމަނަކީ ހަމަނުޖެހުމެއްގެ ތެރޭގައި އޮންނަ ގައުމެކެވެ. މިކަމުގެ ސަބަބުން ޔަމަނުގެ ގިނަ އާއިލާތަކަކަށް ގެއްލުން ލިބި އެމީހުންގެ ގެދޮރު ވަނީ ގެއްލިފަ އެވެ. ސުލްހައަށް މަޝްވަރާ ކުރުމަށް މަސައްކަތްތައް ކުރިއަށް ދިޔަ ނަމަވެސް ބައެއް ސަރަހައްދުތަކުގައި ހަނގުރާމަތައް ކުރިއަށްދާތީ، މިކަމަށްވެސް ވަނީ ހުރަސްއެޅިފަ އެވެ.
