ކުދި އަދި މެދުފަންތީގެ ވިޔަފާރިތައް ކުރިއެރުވުމަށް ސަރުކާރުން އަޅަން ނިންމާފައިވާ ބައެއް ފިޔަވަޅުތައް އަންނަ އަހަރުން ފެށިގެން ތަންފީޒުކުރާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ.

ރައީސުލްޖުމްހޫރިއްޔާ މިފަދައިން ވިދާޅުވީ، މީސް މީޑިއާގައި ކުރެއްވި ޕޯސްޓެއްގަ އެވެ.

ރައީސް ވިދާޅުވި ގޮތުގައި، ކުދި އަދި މެދުފަންތީގެ ވިޔަފާރިވެރިންނާއެކު ބޭއްވި ބައްދަލުވުމުގައި ވިޔަފާރިވެރިން ފާހަގަކުރި ކަންކަމުގެ ތެރެއިން، އެ ދާއިރާ ކުރިއެރުވުމަށް ސަރުކާރުން ގިނަ ކަންތައްތަކެއް ކުރަން ވަނީ ނިންމާފަ އެވެ. އެގޮތުން، ވިޔަފާރިވެރިން ފާހަގަކުރި ކަންކަމުގެ އިތުރުން، ކުރިޔަށް އޮތް 2 އަހަރު ދުވަހަކީ ވިޔަފާރިތައް ކުރިއެރުވުމަށް ހާއްސަ ފިޔަވަޅުތަކެއް ތަންފީޒު ކުރާނެ 2 އަހަރު ގޮތުގައި ކަނޑައަޅާފައި ކަމަށް ރައީސް ވިދާޅުވި އެވެ.

ރައީސް ވިދާޅުވީ ކުދި އަދި މެދުފަންތީގެ ވިޔަފާރިތައް އިތުރަށް ތަރައްގީކޮށް ފުޅާކުރުމަށް ސަރުކާރުން އަޅަން ނިންމި ފިޔަވަޅުތަކުގެ ތެރެއިން ބައެއް ފިޔަވަޅުތައް ޖަނަވަރީ އެކެއް 2026 ވަނަ ދުވަހުން ފެށިގެން ތަންފީޒުކުރަން ފަށާނެ ކަމަށެވެ. އަދި އެ ފިޔަވަޅުތަކާ ގުޅޭ ތަފުސީލުތައް ކަމާ ގުޅުންހުރި ސަރުކާރުގެ އިދާރާތަކުން އިއުލާނުކުރަމުންދާނެ ކަމުގައިވެސް އެމަނިކުފާނު ވަނީ ވިދާޅުވެފަ އެވެ.

އިކޮނޮމިކް މިނިސްޓަރު މުހައްމަދު ސައީދު ވެސް މި މަހު ބޭއްވި ނޫސްވެރިންގެ ބައްދަލްވުމެއްގައި ވިދާޅުވެފަ ވަނީ، ކުރިއަށް އޮތް ދެ އަހަރު ވެގެންދާނީ ކުދި އަދި މެދު ފަންތީގެ ވިޔަފާރިތަކާއި ސްޓާޓަޕްތަކަށް ހާއްސަ އިނާޔަތްތަކާއި ލުއިތަކެއް ލިބިގެންދާނެ އަހަރު ކަމަށެވެ. އެގޮތުން މި މަސަތްކަތުގެ ތެރެއިން އަންނަ އަހަރު ކުދި ވިޔަފާރިތަކަށް 500 މިލިއަން ރުފިޔާގެ ލޯނު ދިނުމަށް ނިންމާފައިވާއިރު، މި ލޯނު ސްކީމުގައި އަންހެނުންނަށް ހާއްސަ ލޯނާއި، މެރިކަލްޗާ، މަސްވެރިކަން، ފަތުރުވެރިކަން ފަދަ 10 ދާއިރާއެއް ހިމެނެ އެވެ.