ކޭ-ޕާކްގެ ފްލެޓްތައް މަކަރާއި ހީލަތުން ނުއަގުގައި ވިއްކި މައްސަލާގައި ހަސަން މަމްދޫހު (މަންޑޭ)ގެ މައްޗަށް ދައުލަތުން ކުރި 94 ދައުވާއެއް ސާބިތުވެއްޖެ އެވެ.

މަންޑޭ އަކީ ކޭޕާކް ރެސިޑޭންސީގެ މަސައްކަތް އެވޯޑުކުރި ހަންބޯ މޯލްޑިވްސް ކުންފުނީގެ ކުރީގެ ހިއްސާދާރެކެވެ، އޭނާ މިކަން ކުރީ ކުންފުނި މެދުވެރިކޮށެވެ.

މި މައްސަލައިގައި އޭނާގެ މައްޗަށް 104 ދައުވާއެއް ވަނީ ކޮށްފަ އެވެ. އެއީ މަކަރާއި ހީލަތް ހެދުމުގެ 50 ދައުވާ އާއި އޮޅުވާލުމުގެ އަމަލެއް ކުރުމުގެ 50 ދައުވާ އާއި ސައްހަ ނޫން ލިޔުމެއް ދިނުމުގެ ތިން ދައުވާގެ އިތުރުން މަނީ ލޯންޑްރިންގެ ދައުވާއެއް އެވެ.

ޕީޖީ އޮފީހުން ބުނި ގޮތުގައި އޭނާގެ މައްޗަށް ސާބިތުވަނީ 94 ދައުވާ އެވެ. އެއީ:

1. ޓެކުން (46 ދައުވާ)
2. އޮޅުވާލުމުގެ ޢަމަލެއް ކުރުން (44 ދައުވާ)
3. މީހަކަށް ކަމެއް އޮޅުވާލުމުގެ ނިޔަތުގައި އެނގިހުރެ ޞައްޙަނޫން ލިޔުމެއް ދިނުން (3 ދައުވާ)
4. މަނީ ލޯންޑްރިންގ (1 ދައުވާ)

މިއީ ރާއްޖޭގައި އެކަކުގެ މައްޗަށް މިހާ ގިނަ ދައުވާ ސާބިތުވި ފުރަތަމަ ފަހަރެވެ.

މީގެ އިތުރުން މި މައްސަލާގައި ދެން ޝާމިލުވާ، ޖައިޝާން ސައީދުގެ މައްޗަށް މައްޗަށް 95 ދައުވާއެއް ދައުލަތުން ކުރި އެވެ. އެގޮތުން ޖައިޝާންގެ މައްޗަށް ސާބިތުވި ދައުވާތަކަކީ:

1. ޓެކުމުގައި ބައިވެރިވުން (45 ދައުވާ)
2. އޮޅުވާލުމުގެ ޢަމަލެއް ކުރުން (40 ދައުވާ)
3. މީހަކަށް ކަމެއް އޮޅުވާލުމުގެ ނިޔަތުގައި އެނގިހުރެ ޞައްޙަނޫން ލިޔުމެއް ދިނުން (3 ދައުވާ)
4. މަނީ ލޯންޑަރކުރުމަށް އެހީތެރިވުން (1 ދައުވާ)

ކޭޕާކުން ކުރި ވައްކަމުގައި މަންޑޭއާއި އިތުރު ބަޔަކު ބައިވެރިވެގެން ހަންބޯ ކޮމްޕެނީ ޕްރައިވެޓް ލިމިޓެޑުގެ މެޖޯރިޓީ ހިއްސާދާރުކަމުގައިވާ ޗައިނާ، ޖިން ޝިހޫގެ ސޮއި ފޯޖުކޮށްގެން ލިޔެކިޔުންތަކެއް ހަދައިގެން ބޭންކް އޮފް މޯލްޑިވްސްގައި ހަންބޯ ކޮމްޕެނީ ޕްރައިވެޓް ލިމިޓެޑްގެ ނަމުގައި ވަނީ ބޭންކް އެކައުންޓް ހުޅުވާފަ އެވެ.

މީގެއިތުރުން އެ ކުންފުނީގެ ފަރާތުން ކޭ-ޕާކް ރެސިޑެންސްގެ ނަމުގައި ހުޅުމާލޭގައި އިމާރާތްކުރަމުންދާ އިމާރާތުގެ އެޕާޓްމަންޓްތައް އޮޅުވާލާއިގެން މަކަރާއި ހީލަތުން އާއްމުންނަށް ވިއްކައި ބައެއް އެޕާޓްމަންޓްތައް އެކަކަށް ވުރެ ގިނަ މީހުންނަށް ވިއްކައި އެފައިސާއަށް ހިޔާނާތްތެރިވެ އެފައިސާ ވަނީ ލޯންޑަރކޮށްފަ އެވެ.

މި ދައުވާތަކާ ގުޅިގެން އަދަބު ކަނޑައެޅުމުގެ އަޑުއެހުން 30 ޑިސެންބަރު 2025 ދުވަހަށް ކްރިމިނަލް ކޯޓުން ވަނީ ތާވަލުކޮށްފަ އެވެ.