ރޭޕްގެ ތުހުމަތުގައި ނުވަ ފަހަރުގެ މަތިން ކޯޓަށް ހާޒިރުކުރުމަށްް އިއުލާނުކުރި، މީހާ އެންމެ ފަހުން ހައްޔަރުކޮށްފި އެވެ.
އުޅޭތަނެއް ނުފެނިގެން ކޯޓަށް ހާޒިރުކުރުމަށް އިއުލާންކުރަމުން އައީ ގދ. ވާދޫ، ސަބާހާ މަންޒިލް، އިޒާމް ޒާހިރު އެވެ. ފުލުހުން ބުނިގޮތުގައި އޭނާ ހައްޔަރުކުރީ އަމިއްލައަށް ފުލުހުންގެ ކަސްޓޯޑިއަލްއަށް ހާޒިރުވުމުންނެވެ.
ފުލުހުން ބުނި ގޮތުގައި، އިޒާމް ޒާހިރު ބަންދުގައި ބަހައްޓައިގެން ކޯޓަށް ހާޒިރުކުރުމަށްޓަކައި، ކޯޓުން ފުލުހުންގެ މައްޗަށް އެކި ފަހަރު މަތިން ވަނީ އަމުރުކޮށްފަ އެވެ. މި އަމުރުތަކާ ގުޅިގެން، ފުލުހުން ވަނީ މިހާތަނަށް ނުވަ ފަހަރެއްގެ މަތިން އޭނާ ހޯދަން އިއުލާނުކޮށްފަ އެވެ. ނަމަވެސް، މިހާތަނަށް ފުލުހުން ކުރި މަސަތްކަތަކުން ނުފެނެ އެވެ.
އެހެންނަމަވެސް އޭނާ ވަނީ އަމިއްލަޔަށް މިއަދު ހާޒިރުވެފަ އެވެ. އިޒާމް ޒާހިރު ހައްޔަރުކޮށްފައިވަނީ ބަންދުގައި ބަހައްޓައިގެން 2025 ޑިސެންބަރު 30 ވަނަ ދުވަހު ކޯޓަށް ހާޒިރުކޮށްދިނުމަށް ފުލުހުންގެ މައްޗަށް ކޮށްފައިވާ އަމުރު ތަންފީޒުކުރުމަށެވެ.
