ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާއި ބައްދަލުކުރުމަށް ހެންވޭރުގެ ރައްޔިތުންނާ އެކު ބޭއްވި ބައްދަލުވުމުގައި ސުޕްރީމް ކޯޓުގެ ފަނޑިޔާރު އާއިޝާ ޝުޖޫނަށް ނިސްބަތްކޮށް އާއްމު މީހަކު ދެއްކި ވާހަކަ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އިން މިއަދު ކުށްވެރިކޮށްފި އެވެ.
އެޗްއާރުސީއެމުން މިއަދު ނެރުނު ބަޔާނުގައި ވަނީ މި މަހުގެ 7 ވަނަ ދުވަހު ބޭއްވި އެ ބައްދަލުވުމުގައި އާއްމުންގެ ފަރާތުން ވާހަކަދެއްކި މީހަކު ފަނޑިޔާރު ޝުޖޫނަށް ނިސްބަތްކޮށް އަންހެނުންގެ ކަރާމާތަށާއި ސުޕްރީމް ކޯޓުގެ ދަނޑިޔާރެއްގެ ގަދަރާއި ޝަރަފަށް އުނިކުރަން އަންނަ މޭރުމަކުން ދެއްކި ވާހަކަތައް ކުށްވެރިކޮށްފަ އެވެ. އެ ބައްދަލުވުމުގައި އެމީހާ ވަނީ ސުޕްރީމް ކޯޓުގައި އަންހެނުންނަށް ފަނޑިޔާރުކަން ނުކުރެވޭނެ ކަމަށް ގަބޫލުކުރާ ކަމަށް ބުނެ ޝުޖޫން މަގާމުން ވަކިކުރަން ގޮވާލާފަ އެވެ.
"ކޮންމެ އިންސާނެއްގެވެސް ނަމާއި އަބުރު ރައްކާތެރިކުރުމަކީ، އިސްލާމީ ޝަރީއަތުން ކަށަވަރުކޮށްދޭ ހައްގެކެވެ. އަދި ހަމައެއާއެކު، ގާނޫނުއަސާސީގެ އިތުރުން، އިންސާނީ، ޙައްގުތަކުގެ ބައިނަލްއަމްވާމީ މުއާހަދާތަކުންވެސް ކަށަވަރުކޮށްދޭ ހައްގެކެވެ" އެޗްއާރުސީއެމްގެ ބަޔާނުގައިވެ އެވެ.
މިކަން ފާހަގަކޮށް އެޗްއާރުސީއެމުން ވަނީ ވަކި ޖިންސަކަށްވީތީ ނުވަތައަންހެނަކަށްވީތީ ކުރާ ފުރައްސާރައާއި، ތަފާތުކުރުންތަކުން އެއްކިބާވެތިބެ، ބިނާކުރަނިވި ގޮތެއްގައި ހިޔާލުފާޅުކުރުމަށް ގޮވާލާފަ އެވެ.
އެ ކޮމިޝަނުން ގަބޫލުކުރާ ގޮތުގައި ފަނޑިޔާރު ޝުޖޫން މުހައްމަދު ފަދަ އިލްމީ، ގާބިލު އަންހެން، ބޭފުޅުންނަށް އަމާޒުކޮށް، ޖިންސީ ފުރައްސާރައިގެ ސިފަ އެކުލެވޭ ބަސްމަގު ބޭނުންކުރުމަކީ، އަންހެނުންގެ، ކުރިއެރުމަށާއި ހައްގުތައް ކަށަވަރުކޮށް ދެމެހެއްޓުމަށް އޮތް ހުރަހެކެވެ. އަދި އެފަދަ ފުރައްސާރައިގެ ސަބަބުން ގައުމީ ހިދުމަތަށް ނުކުންނަން ބޭނުންވާ އެހެން އަންހެނުން ފަސްޖެހި އެމީހުންގެ ހިތްތަކުގައި ބިރުވެރިކަން އުފެދޭނެ ކަމަށް ވެސް ބުނެފައިވެ އެވެ.
" އެހެންކަމުން މިފަދަ އަދި މިނޫންވެސް އާންމު، ކަންތައްތަކުގައި، އިންސާނީ، ކަރާމާތާއި އަނެކުންގެ ގަދަރާއި ޝަރަފަށް، އުނިކަން، އަންނަ މި ބާވަތުގެ ވާހަކަތައް ނުދެއްކުމަށް، މިކޮމިޝަނުން އިލްތިމާސް ކުރަމެވެ. " އެޗްއާރުސީއެމުން ބުންޏެވެ.
