ޗައިނާ ސަރުކާރުގެ ހިލޭ އެހީގެ ދަށުން ރާއްޖޭގައި މުހިއްމު ތިން މަޝްރޫޢުއެއް ކުރިއަށް ގެންދަން މިއަދު އެއްބަސްވުމެއްގައި ސޮއިކޮށްފި އެވެ.
މިއަދު ހެނދުނު މިނިސްޓްރީ އޮފް ފޮރިން އެފެއާޒްގައި ބޭއްވި ރަސްމިއްޔާތުގައި، ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ މިނިސްޓަރ އޮފް ފޮރިން އެފެއާޒް ޑރ. އިބްރާހިމް ޚަލީލް އެވެ. އަދި ޗައިނާ ސަރުކާރުގެ ފަރާތުން ސޮއިކުރެއްވީ، ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ކޮންގ ޝިއަންހުއާ އެވެ.
މި އެއްބަސްވުމުގެ ދަށުން ރާއްޖޭގެ ތަރައްގީއަށް ބޭނުންވާ މުހިއްމު މަޝްރޫއުތަކަށް އެހީވުމުގެ ގޮތުން 600 މިލިއަން ރެންމިންބިން ގެ ހިލޭ އެހީ ފޯރުކޮށްދޭނެ އެވެ. ޗައިނާ ސަރުކާރުގެ ހިލޭ އެހީގެ ދަށުންކުރިއަށް ގެންދާ މުހިއްމު މަޝްރޫއުތަކުގެ ތެރޭގައި ހިމެނެނީ:
- ވިލިމާލޭގައި އިމާރާތްކުރުމަށް ހަމަޖެހިފައިވާ ޗައިނާ މޯލްޑިވްސް ފްރެންޑްސިޕް ހޮސްޕިޓަލް މަޝްރޫއު
- މާލެ-ވިލިމާލެ މަގުތައް ތަރައްގީކުރުމުގެ މަޝްރޫއު
- 50 ރަށެއްގެ ކައުންސިލް އިމާރާތްތައް ތަރައްގީކުރުމުގެ މަޝްރޫއު
އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން، ފޮރިން މިނިސްޓަރު ޚަލީލް ވަނީ ޗައިނާގެ ރައީސް ޝީ ޖިންޕިންގ އަށާއި ޗައިނާ ސަރުކާރަށް ޝުކުރު އަދާކުރައްވާފަ އެވެ. އަދި ޗައިނާއަކީ ރާއްޖޭގެ ތަރައްގީގެ މުހިއްމު ބައިވެރިއެއްކަން ފާހަގަކުރައްވައި، އެގައުމުގެ އެހީގައި ކޮށްފައިވާ މުހިއްމު މަސައްކަތްތަކަށް ވެސް އަލިއަޅުއްވާލެއްވި އެވެ.
ޗައިނާ ސަފީރުގެ ވާހަކައިގަ އޭނާ ވަނީ ރާއްޖޭގެ ތަރައްގީއަށްޓަކައި ޗައިނާ ސަރުކާރުން އަބަދުވެސް އެހީތެރިކަން ފޯރުކޮށްދެއްވާނެކަމުގެ ޔަގީންކަން ދެއްވާގަ އެވެ. އޭނާ ވިދާޅުވީ އެ ގައުމުގެ އެހީގެ ދަށުން ކުރިޔަށްގެންދާ މުހިއްމު މަޝްރޫއުތަކުގެ ސަބަބުން ޗައިނާއާއި ދިވެހިރާއްޖެއާ ދެމެދު އޮތް ގުޅުން އިތުރަށް ބަދަހިވެގެންދާނެ ކަމަށެވެ.
