ގަވާއިދާ ހިލާފަށް ރާއްޖޭގައި އުޅޭ ބިދޭސީން ލީގަލައިޒްވުމުން، އެމީހުންނަށް ވަޒީފާ ހަމަޖައްސާނެ ކަމަށް ހޯމް މިނިސްޓްރީއިން ބުނެފި އެވެ.

އެ މިނިސްޓްރީއިން ބުނިގޮތުގައި ރާއްޖޭގައި ވަޒީފާ އަދާކުރާ ބިދޭސީންގެ "މާސް ލީގަލައިޒޭޝަން ޕްރޮގްރާމް" އަންނަ އަހަރުގެ ޖެނުއަރީ 1 އިން ފެށިގެން އޭޕްރިލް މަހުގެ 2 ވަނަ ދުވަހާ ހަމައަށް އޮތީ ހުޅުވާލާފަ އެވެ. މި ޕޮރޮގްރާމްގެ ތެރެއިން ހުއްދައެއް ނެތި، ނުވަތަ ހުއްދައެއް އޮތްނަމަވެސް ހުއްދައިގެ މުއްދަތު ހަމަވެފައިވާ ބިދޭސީން ނުވަތަ ކާކުކަން އަންގައިދޭ ސައްހަ ލިޔުމެއް ނެތި އުޅޭ ބިދޭސީންނަށް އަމާޒުކޮށް އޮޕަރޭޝަން ކުރަނގީގެ ދަށުން ލީގަލައިޒްވުމަށް ފުރުސަތު ދޭނެ އެވެ.

މިނިސްޓްރީއިން ބުނި ގޮތުގައި، މި އެކުލަވާލެވޭ ދަފްތަރުގެ ތެރެއިން ވަޒީފާ ބޭނުންވާ ބިދޭސީން ތިބި ނަމަ އެ އިންތިޒާމްތަށް މިނިސްޓްރީިއިން ހަމަޖައްސައިދޭނެކަމަށެވެ. އަދި އިތުރު މައުލޫމާތު ބޭނުންވާ ނަމަ 1485 ގުޅުއްވައި ނުވަތަ xpat@mohst.gov.mv އަށް އީމެއިލް ކުރެއްވުމަށް މިނިސްޓްރީއިން ވަނީ އެދިފަ އެވެ.

މި ސަރުކާރުން ދަނީ ބިދޭސީންގެ މައްސަލަ ހައްލުކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން އޮޕަރޭޝަން ކުރަނގީގެ މައިގަނޑު މަގްސަދަކީ ދިވެހިރާއްޖޭގައި ދިރިއުޅޭ އެންމެހާ ބިދޭސީންގެ ބައޯމެޓްރިކް މައުލޫމާތު އެއްކޮށް، އެއް ޑޭޓާބޭސްއަކަށް ޖަމާކުރުމެވެ. މީގެ ސަބަބުން، ނުގަވާއިދުން ދިރިއުޅޭ ބިދޭސީންގެ މައްސަލަ ހައްލުކުރުމަށް ފަސޭހަވެ، ލޯކަލް ކައުންސިލްތަކަށް މި މައުލޫމާތު ލިބޭނެ އިންތިޒާމު ހަމަޖެހިގެންދާނެ އެވެ.